Kaca:Geguritan Mladprana.pdf/133

Saking Wikisource
Kaca puniki kavalidasi

129

ngedot ngenyud, twara dadi ban ngamberin, mangkin bimbang mamancana, kabancana den kung lulut, raris meseh rupa, waluya sakadi nguni,
nuli turun manangsekang, I Mladprana nyapa alus.
12. "Inggih dewa saking napi wengi prapta, pawongane nikang dumun, napi
sadiane rawuh, turin mameteng manyingid, malih bajang cerik ida, makakalih bangkit muluk." Sang katakenan ngucap, "Tiang nyadia wantah
mriki, mangapti pacang mamanjak, mangayah satunggun idup.

13. Swecayang kayun i gusti nah idepang, ngenceh ring sombahe mlumut,
nywecin babanden mategul, anggen juru pecik batis, mangilihin kala
nguyang, yadian ke dadi tatingguk, sarwi mangalengin tangan, mangupkupang kala dingin, juru sembar nuju sungkan, kwanten polih mimpek
nyintud.

14. Yan sampun sweca i gustine ring titiang, sapakayun titiang turut, nganggo ngajeng nginum, titiang nyadia manuwukin, yaning makayun mangguran, menek saduwurin embun, yadian batan tanah, titiang sanggup
pacang ngiring, makalangan ring sagara, yadian ring pucaking gunung.

15. Kwanten sweca manambanin sakit titiang, gelis nyampi antuk iku, ne
pingitang i ratu, mangda wusan mrat mangkin, ne tan sakit ipun malara,
ka ati jajah manyusup, ngranayang bulasak, munyi ngacuh mangumikmik, sakadi paksi Cataka, ri kalaning sasih lahru.

16. Bedak tan kena hrotin sakit manah, manah kasamaran ibuk, ibukang ne
suba tepuk, tepuk twara bakat tundik, payu titiang enyud ngingak,
nyingak atu twara kayun, kayun mangandika, salih ka pacang ngaworin,
awor ring titiang i pongah, pongah teka mai nyintud.

17. Nyadia nunas bekel mati-mati ngawag, ngawag buwungang mangulgul,
ngulgul ratu bekut, ngupkup ngembar anak istri, istri kakalih utama,
tami ratu saking ngregut, regut rusut marebat, ngrebutin ngetohang
urip, uripa urupang mudah, irib aluh ngalih angsur.

18. Patin keris pican gusti lintang pangan, dangan ngamadwang nak eluh,
mamadu madwi ngrusuh, yaning encotang abesik, besuk ratu mangitungang, ngitungang ratayang ngedum, ngedum apang asah, asah asihe
apasih, mayah panglemek utama, ombakin antuk salulut. "

XXVI. PUH GINADA
1. Keto munyin Pancapuspa, I Mladprana tan nyawurin, Jangga Ketaki mirengang, munyi mamatbatang madu, raris dane mangkin medal, nesek
mlinggih, tirin natas nyangga mojar.