Kaca:Geguritan Mladprana.pdf/119

Saking Wikisource
Kaca puniki kavalidasi

115

12. Ngandika mangembang aksi, "Aduh dewa, enyag basang bapa ngrungu, tuah saja asing tumuwuh, ia mabeke1lara pati, yan sanget mangguhin liyang, gede sebete kapangguh, dening mula tuar belas, betek layah tiwas sugih, mati idup suka duka, seger sakit pelih patut.

13. Nah bapa ngindayang jani sing nya ada, suecan Ida Sang Hyang Tuduh, nguduhang apanga idup." Raris ida manyampenin, nulung antuk Mretyu-jiwa, makamiwah dasa-bayu, masedana mantra, I Mladprana mangalilir, wau eling teken raga, kambang kumbang nrawang-nruwung.

XVI. PUH MAS KUMAMBANG

1. Bau eling, kaden ilang Jangga Ketaki, tengkejut merengang, wau Ketut Oka panggih, malih metu rahnya muncar.

2. Tur macepol bayu runtag mangadirdir, enyem suku tangan, Ni Jangga Ketaki nyerit, sedih ngeling ngacuh ngawag.

3. Tur kakocok, lambe pangaksian kabitbit, tur dane kabatbat, ngagem pisan jeneng gusti, ngawe sakit manah titiang.

4. Nggih yan gusti, tulus jani maninggalin, pacang pisuh layon gusti basah dini, mangda garang asu ajag.

5. Ketut Oka, kaliwatan sebet sedih, bungeng buduh ngopak, ngopak anak kuru sakit, tan nyukatang ne ring raga.

6. Raris ida, Mpu Wrediaguna manyawis, "Suwud ngacuh ngopak, bapa mastikang nulu ngin, don piduh ambengan aliang."

7. Ketut Oka, gelis ngrereh sampun polih, tur raris ngaturang padanda nyapen manyampi, kajampi tatune uwas.

8. Kewanten biket miwah, sakitnyane kari, ia I Mladprana, raris bangun mangubakti, ring ida Mpu Wrediaguna.

9. Tur matur, " Inggih Ratu Sang Mayati, sueca lugra jiwa, durusang suecana ugi, nambanin titiang wong nista.

10. Yaning sadia, titiang seger kari urip, rahajeng matulak, ka Purbawyanjana malih, titiang mangaturang punia.

11. Ali-ali masoca manik akatih, wastra tlung rangsukan, sarwa sutra sane putih, miwah pegandan apasang."

12. Puput matur, raris Mpu manyaurin, "Nah ne jani jalan, pasraman bapane ungsi, ditu bapa micang tamba."

13. Raris bangun ipun, Ni Jangga Ketaki, nuntun I Mladprana, "Baong titiang gelut beli." Ratis bangun I Mladprana.