112
13. Titiang suba ngrasa mangkin, ne malu bas kajoragan, titiang manyulsulang awak, yan angde tingkahe suba, pitik nyulsul sikep galak, timbungan manempuh bungut, dadi tuara nyak ajengang."
14. I Mladprana nyaurin, "Sampun ratu nyalit arsa, titiang mitahen ring iwang, nah ne sub ampurayang, mangkin yaning purun titiang, nulakin kayun i ratu, ledang kayune myisipang.
15. Yan titiang nitia ring janji, dumadak ja ratu titiang mati kajet dongkang kipa, labuh nepen song baduda, sander capung lakitikan, samangdene uluh legu, kasarap antuk lelasan.
16. Pinunas titiang abesik, kimon gusti manggeh sueca, yan nora sueca i dewa, becik jumud urip titiang, niki keris nggen muputang, mangdan titiang suud ngulgul, mamerud manunas ica."
17. Jangga Ketaki nyaurin, "Yan sampun manggih i dewa, pang da kadi i bramara, tresna tekenin i bunga, eda manasak paspasan, sampunang kadi i kepuh, di crita Tantri punika."
18. I Mladprana manyaurin, "Ampunang ratu sandeha, pang da ampat pakayunan, kenken pamidin i dewa." Ni Jangga Ketaki ngucap, "Da ja beli akeh wuwus, wireh sampun surup surya.
19. Ngiring nyayub sane mangkin, ring guan bingin punika." I Mladprana ndatan tulak, mamargi madandan tangan, tan sah ngaras bilang tindak, goba tingkahnyane atut, kadi bulan sanding bintang.
20. Teked di guane ngranjing, merem matikeh kedapan, ngraos matutur-tuturan, nuturang tingkahe suba, selanin awor semara, rasa jaen nyanggel nyusup, kapolo neked ka jajah.
21. Boya nyandang critang malih, puput tingkah buat karasmian, pinah sue sampun drika, asta dasa punang dina, Ni Jangga Ketaki ngucap, "Jalan ke masucian ratu, ngaksi karasminan ing alas."
22. I Mladprana ngucap aris, "Titiang sairing tan tulak." Raris kesah pakalihan, adoh manglanglang kalanguan, rauh angin nglinus sulak, guak nyanderin pasliur, nyihnaang durmangala teka.
XIV. PUH DURMA
1. I Mladprana mojar ring Jangga Ketakia, "Margi tulak mangkin gusti, niki cihnan terang, pacang ganti manggih baya, len pabawan Sang Hyang Ari, makalangan teja, rahina katon wraspati."
