111
XIII. PUH SAMARADANA
1. Sedih kingking kaprihatin, nulame masesambatan, "Inggih Ratu Sang Hyang Titah, jamud mangkin urib titiang, wireh sue nandang lara, elas maninggalin guru, i riki manyusup alas.
2. I Meme ninggalin mati, enyen malih tolih titiang, ane tresnin suba elas, braya waggi tuara ngelah, buron jani anggon kadang, mapisaga teken lutung, i macan anggon sawitra.
3. Merak panggih ngigel becik, merokang mecokang manah, titiran manotor lega, bawine ngilangang bawa, menjangan ngajingang liang, mangut-ngut ngawe marengut, ebet ngawe sebet manah.
4. Manahe misadia mati, uripe kalintang kuat, pisan jani jua lipurang, raris bangun dane mahas, sue nyusup bedak layah, raris dane ngalap gunggung, anggen sangu nyusup alas.
5. Sedek ngalap gunggung manis, sambilang dane ngajengang, raris wenten mangkin cingak, manusa pules irika, muannyane kailidan, kaangkebin antuk saput, raris dane mangkin mojar.
6. "Inggih jro manusa dini, apa pisadiane ngalas, yan sadia nusta mamegal, neh urip tiange juang, hyang misadia maang upah, ene selaka akutus, maimbuh bungkung ginaran."
7. I Mladprana ningeh munyi, kari ngidem ngrabang sawa, inab ia Ni Ketut Oka, raris ia bangun magebras, kanten sinah Ketut Oka, raris nasekang mawuwus, "Jiwatman titiang ida."
8. Ketut Oka ngenjuh uri, rengu mamengos mangucap, Ketut ujar nyane bangras, "Apa alih beli teka, lakar apa nresnin titiang, titiang jadma jalir buduh, turin tiwas goba kasar.
9. Nah depang ja titiang mati, pang suud ngae duhkita, apang da santul i dewa, ngalih ane jegeg pradnyan, titiang jele depang kutang, bin maan suba ne malu, nyarinin nganggo palalian.
10. Kanggiang munika nyakitin, mrika beli tulak budal, yan i riki nyusup alas, buka elus dadi ida, gsit ngranang gesut manah, gunggung ginggang bana kayun, suung ngranang masuangan.
11. Bukuit bekut bana ati, irengan ngerangin manah, samong smang kaduhkitan, manggih sedang sedih ida, legune ngilangang lega, gaga ngranang tong kagugu, sarwa paksi kunang paksa.
12. Dasar mekanin nggih beli, rasanin jua atur titiang, lawar gerang da nyagerang, nagih medon jaka wayah, makaronan ajak titiang, da masok gede i ratu, nagih mangodagang titiang.
