Kaca:Geguritan Mladprana.pdf/114

Saking Wikisource
Kaca puniki kavalidasi

110

6. I Mladprana masawang manurut, mlali kapisaga, bajang truna mangenemin, ngantos makasore nganggur, nyumingkin kenehe bingung, sing awasin katon nyirang, raris mangkin dane mantuk, sampun nalikan apisan, nuli ngojog ka pemreman.

7. Ngancing kori raris dane aturu, tan maren bulasak, raris bangun masasangi, "Inggih ratu Sang Huang Wisnu, Hyang Agni Surya iku, saksi jua atur titiang, yan sadia titiang kapangguh, tuara titiang pacang tulak, kalan ing anggon kurenan.

8. Titiang pacang nyadia mapitirut, tuara mapitulak, satuduh Jangga Ketaki, ring patemon titiang ratu, nyadia ngabin makatelun, tur ngawentenang karamian, kumedi gambar puniku, miwah kembang api cina, solas dina ada wayang."

9. Mangamikmik raris dane bangun, bangun lempuyengan, lesu rasa tan pagalih, kadi dawut tan pabayu, batis ngetor kadi rumpuh, kabatek ban sebet ngonyang, nglawanin masih lumaku, ngulati Jangga Ketaki, bilang tindak maangsegan.

10. Ngenah bintang kartikane kauh, minab Ketut Oka, pakrejep rasa mawangsit, tada asih ngengkik alus, inab Ketut Oka iku, sedih kingking engkak-engkak, I Mladprana jua ngarungu, mangkin manahe duhkita, tan sah mamespes yeh mata.

11. Raris dane mangkin ngalaut, maninggal pradesa, ndatan carita ring margi, ring Alas Mayura rauh, tatas lemah neked ditu, ban licit raris mararian, negak mecik batis nguntul, raris ningeh munyin kidang, makaik ia nengkejutang.


XII. PUH PUCUNG

1. Ngesiab bangun, I Mladprana tengkejut, kaden Ketut Oka, ngelur sambilang malaib, raris bangun, Mladprana nyusup alas.

2. Alas ngrembun, suket akeh duinipun, sengka ban majalan, mararian dane ne mangkin, wireh lesu, turin ayub ban damuhan.

3. Negak ditu, di batan kayune tunggul, wenten siung prapta, luh masarengan muani, iban ipun, ngewek mangawenang jengah.

4. Buin I Blatuk, bau teka laut ngulkul, irib ngataraang, Mladprana sakit ati, raris bangun, malih nyalupsup ka tengah.

5. Malih kuru, sampun lingsir dauh pitu, macepol manegak, di batan gununge ngepil, tan kawuwus, Jangga Ketaki carita.