108
3. Puput mojar raris tulak, tan critanan Ni Luh Ngasa wus mulih, Ni Ketut Oka kawuwus, sedih kingking manah buyar, "Duh kenkenang, kadung pelih ban ne malu, dewek anggona palalian, mara jani ngrasa pelih.
4. Yaning kenehe tuutang, ngalih ia I Mladprana ne jani, yan tulak teken i guru alpaka reke adannya, yan iringang, ngenyakin Rudita iku, tusing pageh guru-lakia, tan wangde nraka kapanggih.
5. Nah jani pisan laluang, lasia pejah wekasan malih jurnunin, nabdabang kenehe patut, ane jani kadung iwang, nah alahang, uripe anggon manaur," keto manahnya pragat, kacrita jani ring wengi.
6. Wen ten pingan tengah wengia, laut bangun satiba para mamargi, ngungsi alas durga rejung, jani tan crita ring wengia, tatas lemah, ring alas mayura rauh, alas suket madurgama, makueh macan lan kesari.
7. Kaclepin alas punika, tuara ngitung kena lateng miwah dui, ngungsi ka tengah manyusup, raris ngacundukang macan, Ketut Oka, asih ia masabda alus, "Jro macan tadah titiang, apang mati suud sedih."
8. Ngalingus makaad i macan, kapiwlasan tuara nyak mamati-mati, Ni Ketut Oka ngalaut, ebete gede nyurambiah, gua linggah, kacelepin gua iku, mlaib singane murengang, Ni Ketut Oka kajrihin.
9. Sarwa galai ajrih pisan, teken patut turin nirmala satiti, Ni Ketut Oka punika, ngrasa tuara enyak pejah, raris ditu, ring gook bingine nayuh, punika kaanggon umah, peteng lemah sai-sai.
10. Tan crita Ni Ketut Oka, kacritanan I Rudita sane mangkin, mapineh di kenehipun, "Nguda tembe tengai pisan, Ketut Oka, dadi tuara dane bangun," raris ngojog kametenan, nyadia nundun apang panggih.
11. Raris ngusudin pedeman, enyem latig lad ibi sanja tan kari, ngatabtab ngararis pesu, "Inggih Bapa Cede Taman, jani kudiang, Ni Ketut Oka tan kantun, lahad ibi sanja ilang, dija jani ruruh alih."
12. I Cede Taman angucap, kablegbegan. "Cai kema ngorahang mulih," I Rudita jani mantuk. Sateked dane ne jumah, "Inggih Bapa, titiang jani tempuh lacur, Ni Jangga Ketaki ilang." Bapannyane manyaurin,
13. "Ilang nyen maorta nyuang?" Kesaurin, "Durung kanten ne mangambil." I Huru ja raris pesu, tur nyarayang gendongan, raris rauh, i wong desa pacerungung, I Huruja midartayang, raris masaserep mangkin.
14. I Rudita raris tulak, ka Wanapuspa dapetang sampun makinkin, I Gede Taman mawuwus, ring sami i wong desa, "Jalan luas, maseserep nyusup trejung, yan panggih Ni Ketut Oka, suba matimpal muani.
