103
4. Tan critanan, ane ditu makakawin, Mladprana crita, ningehang bucica nguci, irib kedek ngawe jengah.
5. Tuu-tuu, mrasa ngopak jerat-jerit, Mladprana mrengang, mara nolih galang kangin, raris nyrucut dane budal.
6. Neked jumah, raris ia makarya tulis, surat babesan, nguningang manahe mangkin, pamunyin surate nyajang.
7. "Ratu ayu, resepang atur i miskin, pitaken ring ida, akenken kayun i gusti, krana nglongin ubaya.
8. Jeneng mula, taresnan ratune ganjih, dong ja saking tresna, takut di arep saking geting, kadi nakutin lalintah.
9. Krana dadi, ubayane baya sami, ugaga ban degag, demene buia ancurin, kupak antuk salah arsa.
10. Tresna ngonyang, dadi palalian mleketik, tunggul ban supata, matinggal sampun magedi, katundung banjengah wirang.
11. Prataline ban ubaya, salulut sai, gedege megatang, kancingin ban upasaksi, canggih gunjihe ngelesang.
12. Krana ida, tong bisa negakin munyi, saja tuara nawang, munyine pawakan angin, layahe lemuh ngilegang.
13. Nto awanan, kadi taluh yan upami, putih kedas nyalang, ngenahnya uli di sisi, di tengahnya malegendah.
14. Mula atu, seneng nglompang ngamaukin, manis pengandika, kamugutan teken daging, nanging tresnane ngampar.
15. Kadianggan ing, mapikat ratu mikatin, titiran ban goak, ndikapan sih pacang keni, sinah ipun mangejohang.
16. Ngalih tresna, gedege anggon nasarin, sinah ipun rengas, kadi ngubuh bebek muani, buin pidan taluhne bakat.
17. Amunika, upami kayun i manik, krana payu titiang, ngalih lega legu keni, ban cagere ngacagerang.
18. Ngalih jegeg, nyagegage payu keni, ngalih asa melah, asu ngulun manekanin, ngalih cunguh bakat congah.
19. Ngalih lemah, ngantos lemah maan licit, nyadia nunas ica, bacica ngedekin nguci, ngalih pipi papa bakat.
20. Krana jani, nyandang pisan jua tangarin, da bas kadroponan, manise tuah mamanasin, suluke wantah nganyudang.
21. Nto krana, manah titiange masalin, arah banggiang titiang, tuara bungah nganggo prancis, prancise leledan jagat.
