102
8. Yadiapin titiang mangkin medohan linggih ring i dewa, atma jiwan titiang, ring i ratu neket sai, antuk bakti lintang cukup, tuara sida ban ngelenin, krana pageh sarat ngraksa, ngemit ne pingit i ratu, diatun rerama melegang, tur kapaksa, titiang nglawan pageh ngemit, misadia ngetohang jiwa.
9. Krana titiang misadia ngetohang urip nresnin ida, reh ing kadung titiang kadi benang yen upami, tatalokan wus macelup, keni celepin i gusti, kadulurin perah melah, samanah titiang katurut, tuara taen salah arsa, miwah duka, tan sah suka makarasmin, eling sasiki ring titiang.
l0. Arah kudiang titiang tuara bakti ring i dewa, ban bagus ngonyang, Sang Hyang Semara ngutpeti, krana baguse manerus, kayun becik rupa genjing, Mlayu Panji Sanjaya, Sang Arjuna Kresnaku, kasor mungguing kabagusan, yan ring suargan, Hyang Indra kasob mangaksi, Sang Hyang Siwa Nilakanta.
ll. Aruh kudiang titiang nyangka budi ring i dewa, yan paksa jangkayang, jangkeh jangkung titiang dadi, krana tituang mangkin matur, nunas ica ring i gusti, nyanan sueca ngrereh titiang, neked ditu badauh, di karange tuang ngantosang, painganan, wenten sampun tengah wengi, mangda napak sampun drika.
12. Sapunika atur titiang mungguing tulis ring i dewa, niki cihnan terang, patitip titiang ring gusti, bungkung titiange ring tujuh, muah sabuk titiange plangi, kamen crik amesan, odak miwah lungan kuku, ganten madulur tegesan, miwah destar, songket babantangan becik, wastra batik Jugjakarta. "
13 . Puput nyurat raris dane mawali ring Ni Luh Ngasa,"Niki mbok aturang, surat titiang ring i beli, punika duluran ipun. " Ni Luh Ngasa mananggapin, mangararis ipun budal, neked jumah kawuwus, Ni Luh Ngasa manangsekang, "Ene surat. " I Mladprana nanggapin, raris kapaca ring manah.
VII. PUH MAS KUMAMBANG
l. Sampun krasa, sadaging surat sami, tan critanan lemah, kacarita sampun wengi, Mladprana jua marika,
2. Neked ditu, di karange tuang nengil, Mladprana crita, kacrita Jangga Ketaki, tong maan ambah makaad,
3. Baan katah, truna bajang mangenemin, nganggurin Rudita, ngajain ia makakawin, pinah kantos buka lemah.
