Kaca:Geguritan Mladprana.pdf/101

Saking Wikisource
Kaca puniki kavalidasi

97


10. Apanga dadi yuwana, mamanggihin legan ati, atin titiang ring i mirah, yen i ratu nora asih, nyen konkon nake sudi, kadianggan ing cicing berung, i ratu mula nruwenang, lamun i ratu tan asih, masa urung, titiang mamanggih duh kita.

11. Kitan titiang ring i dewa, nguda ratu tan panolih. Yadian tan cumpu i dewa, nora seneng tan nresnanin, elek takut masih tusing, ring titiang pongah mamerud. Yadian sapunika ida, tan wangde titiang ngulanting, tuara kimud, tusing jengah kasepekang.

12. Reh manahe langkung sarat, mangalinus kadi angin, wulangune kasamaran, lumimbak makadi pasih, taresna saha mapanggih, suluk kadi, yeh macebur, sungleng manahe dumilah, muntab kadi gunung api, lebian enyud, kadi tanah yan upama.

13. Empugane dalem linggah, Ratu jani melaburin, ngujanin antuk duhkita. Isep titiang nika sami, ban manah tan rered bakti, krana tong marasa ibuk, ibuke suba bubukan, erang manah urung sami, gedegipun sampun sami madegdegan.

14. Elek suba maleklekan, osah suba dadi asih, asih-kasih asih teka, malulut ngalilit hati, pedihe sampun pakidih, takute suba ia bekut, ngidalem nyilem satata, kasemarane nglaranin, bas kadurus, ati bingung bakat bungang.

15. Bungan matan titiang ida, nguda mamengos i gusti, tuah ke saja tuara nyandang, titiang manjakin i manik, satsat cabol nungkap langit, yan ring kedis kadi puuh, nagih manyanding i merak, yan ring wastra blacu dekil, nagih manduk, i prancis lintang nguranyab.

IV. PUH DEMUNG

1. Ento makarana Adi tan tolihan, teken pasawakan inguh, bahan beline buduh, mula beli uli cerik, manjus baan kagedegan, masugi ban liyat rengu, mambuh ban ujar para, mapun bahan sakit hati, sai matoya ban temah, mabunga ban munyi pisuh.

2. Pisuhe pisah ne jani sebete sabatang, rengute rengatang empug, gedege jani gudug, temah pastu amah pisi, ujar a1ane jua ulah, ulah beline mamerud, nyewaka ring i dewa, ratu nguda ngajang pedih, lemperang kayun i dewa, nguda gusti tong nyak teduh.

3. Surya petengne ngebusin panes bara, masih ida dadi teduh, angin baret ngalinus, bisa alus mangusirair, pasihe ia dadi puras, besi bisa masih elung, macane kereng manyarap, masih ia bisa kasih, atu bengkung nyen katulad krana tong dadi ban teduh.