96
III. PUH SINOM
1. I Rudita ia mananggap, raris ipun mangenjuhin, gelang kana sekar emas, papending lan ali-ali, "Niki Adi aturan beli, cirine bakti saturut." Ni Ketut Oka mitulak. Gede Taman muwus aris, "Tampi eluh, pabaan belin idewa.
2. Nyai suba plegang Bapa, jani ia ajak dini, bisang awake manyama, keneng-keneng ia ayahin, sapabaangnyane tampi." I Ketut Oka amuwus, "Inggih beli titiang nunas." I Rudita mangenjuhin, sada kenyung, sambilang ngecekin bancang.
3. Jangga Ketaki ngesiabang, "Sampun sih aketo beli. "I Rudita manyaruang, nyemak papuan nginang sirih. Reh ing lintang kabilbil, temakone pakpak malu, pamore kasisigang, lengeh lebuk tuara gigis, ban ulangun, ngantenang Ni Ketut Oka.
4. Ban pangguh kenehe liwat, dadi bingung lengah paling, manguyuk masebeng kiyap. Bayune ngareteg sami. Gede Taman muwus aris, "Masare ko cai dumun, nyai kema ngulig odak, borehin ia belin nyai," raris tedun, Ketut Oka ngulig odak.
5. I Rudita mangurayang, ka pedeman lawut nyumpling, Jangga Ketaki parapta, makta odak gading merik, "Gelisang matangi beli, maodak beli dumun." Wayan Rudita mage bras, raris dane kaodakin, ditu lawut, ngenjuang tangan ngabag tangkah.
6. Sampun usane maodak, caritanan jani wengi, ada nalikan ping tiga, ngranjing Ni Jangga Ketaki, I Rudita manutututin, Ni Ketut Oka amuwus, "Kema ke beli pesuan." I Rudita manyaurin, "Ngawos malu, beli nyerahang awak.
7. Apang nyai mangodagang, akenken pituduh nyai, beli tuara pacang tula, pinunas beli abesik, titiang sakit buduh paling, buduh teken ratu ayu, ento ne pingit mudahang, manah titiang sai kanin, jampi ratu, antuk ganten muah tegesan.
8. Susu rupit gading nyalang, anggen nambanin sesai, pupug baan wangkong rengkiang, lukat ban pangaksi luncip, lolohin jua baan lati, ne ngatirah manis muluk, usug ban batis mamudak, tutuh ban pakayun asih, arap ipun, murup ganten ring pamreman.
9. Pipi montok anggen sembar, trag ban salulut sai, raket pakayune tresna, anggen jua pangraksa urip, ngemanying anggen nglabanin, magaleng tangan magelut, anggen panyengker tatulak, rasane nemuang karasmin, makambuh, ban ubaya ring pamreman.
