16. Sampun sukayan ring hati, ring kadi sepah ucapan, madan ratu ngenteng-enteng, prajurite sami egar, nyadia wantah taurang, sanjata sregep sampun, rata miwah gajah kuda.
17. Gelising carita sampun mijil, sang nyadia memagut yuda, kadi gentuh pamargine, gending gong beri satusan, bende sungu lan kendang, lelontek katah lan tunggul, benderane warna-warna.
18. Rauh ring pangadang gelis, laris maningkahang gelar, gelar garuda wastane, dadi cucuk Ida Bana, manca brahmana wala, ring kampid kanawan mungguh, Arya Sangka lan Utara.
70b.
19. Kampid kebot manindihin, arya Salwa lan Janaka, Pramoda dadi tendase, sang prabu dadi pengawak, kukuh kaliwat-liwat, sang Kadimaya ring ikuh, miwah sakatah punggawa.
20. Musuh rauh kadi pasih, wadwa detyane nyarambah, saking gunung panangkane, sahasa laut mangrempak, wadwa Singala tadah, pagepyuke sami purun, kalangkung kabina-bina.
21. Silih sempal silih kandik, silih arug silih pedang, katah punggal katah jengkel, getihe mabuyayagan, bangkene pajulempang, sayan rame sayan maduk, raksasa nglawan manusa.
2. Katah detya gempal bukit, panagele sada ngawag, sering lempas panujuan, katah detya juru sabat, batune kadi ujan, wong Singala katah buncul, katah mati sapisanan.
23. Ida Bana laut kungsi, antuk raksasa arahan, lenged panguyeng gadane, katah polih micundangang, miwah para ksatria, baudandane sang prabu, pada maniwakang panah.
71a.
24. Karena katah detya mati, miwah ne ngambah gegana, kadi rasa ujan bangke, ada tukung ada punggul, rasa magunung sawa, makarang sanjata lung-lung, getihe kadi segara.
25. Sang Indrabajra mapulih, kroda manumplakang gajah, sang Sanwa rumpak kretane, keni katerajang gajah, sang Salwa mangelisang, nyambut gada laut ngempluk pejah gajahing raksasa.
236
