5. Arya Dasabahu putra Kasi, biniseka madeg dadi raja, sang prabu Datra putrane, sang prabu Dasabahu, maha raja Kasindra puri, tinengeran dening jagat, panegarane atut, sampun kaloka ring jagat, ratu kalih negara prawira sakti, Kasi miwah Astina.
59a.
6. Kacrita sri raksasa pati, Purusada prabu Ratnakanda, lami nusup ring alase, mamuru-buru manusa, labuhe ngurudug, tan dadi malih bangunang, kasah-kasah lami-lami dadi sakit, horem tan polih pangan.
7. Ngatuju wang tan wenten mamanggih, krana kantos lami gela-gela, sang prabu Purusadane, ragane es masriyung, kesiab-kesiab, ngarasa ngalaris, sampun makacacungan, pati sambat-sambat, sesangine mangaturang, ratu satus ring Hyang Kala yen mawali, sakite dadi kenak.
8. Kapiarsa ring Sang Hyang Kala gelis, nadak seger prabu Purusada, mawuwuh kekuatane, suba elah tur lantur, kesaktiane kadi duk nguni, kereng kaliwat-liwat, bisa kebiar-kebiar, majalan ring awang-awang, punggawane laris rauh maka sami, masarengan wimana.
9. Wimanane raksasa makampid, kadi gruda mamua raksasa, karangkung-rangkung agenge, misi mabale luung, pakakase sarwa mas manik, ngunine sang Rawana, detya Lengka prabu, masih madrewe wimana, duk rusake sang Rama polih nglinggihin, wimanane ajahan.
10. Laris malih katulakang gelis, ring sang madrebeyang, batara Daneswarane malih saduke wau, prabu Boma danawa sakti, ratu ring Pragiotisa, saktine kawuwus, masih madrewe wimana, saking nyarah Hyang Daneswara kasor riin, antuk sang raja Boma.
11. Sesampune sang raja Boma mati, kakasorang ring betara Kresna, sinuun Dwarawatine, wimana malih katur, ring sang druwenang riin, betara Danasateru, ne mangkin sang prabu, Purusada Ratnakanda, wimanane saking nyelang becik-becik, ring Sang Hyang Daneswara.
224
