29. Kocap ring lurah punika, wadua detya nyalusup katah rungsing, sanget-sanget mangriridu, mangrusak ring patapan, pangagenge mawasta sang Jaya Wisnu, punggawaning Purusada, ring Ratnakanda nagari.
30. Sang Dasabahu mamapag, miwah para putrane tigang siki, nanging pamargine medum, tingkahe magut detya, para putra titiga yudane ngunggul, katah detya kapademang, larud sasesaning mati.
31. Sang Dasabahu ngalawan, Jaya Wisnu rangkung ramening jurit, tigang dina suenipun, maruket mauderan, panah telas gada cakra kadga remuk, nuli mapeluk ring tangan, denawa gidate keni.
32. Katempeling tur medal rah, Jaya Wisnu polih gelis malaib, Sang Dasabahu mamuru, kagiat sang Sutasoma, kacaragah antuk danawa kaburu, gidate buncul medal rah, banget layu prangas-pringis.
57a.
33. Jag nyembah mangaras pada, nunas urip ature ngasih-asih, Dasabahu nuli rauh, kagiat duk wau nyingak, ksatria anom rupane rangkung bagus, makalihan ring pandita, laris kadangsek ring gelis.
34. Patakene "Sira ida, kabinawa rupane liwat lewih, solahe mawadua rusuh, kasembah rin denawa, detya corah membuyag I Jaya Wisnu, uwakang gati-gatiang, detya kena dosa pati".
35. Sang Sutasoma nyaurang, "Salah sengguh ida narka puniki, boya ratu detya tuhu, amba saking patapan, kapapagang detya ngidih tulung, wit kasor keni kaulah, kranane amba kukuhin".
36. Sang Dasabahu nyaurang, "Asing-asing ngalangin pasti jani, payu digati mapeluk, nyentokong apurusan", tur saha mangancap niwakin isu, masiyok samian ilang, tan nempuh angan sasiki.
220
