31. Jeg ngaranjing ka jro kuta gelis, reh sang ratu Malawa punika, kaserah Kasi purine, Sang Arya Desabahu, sampun ngaranjing ka jro puri, ngungsi karang kaputrian, bancingahe sampun, kabekan mantri punggawa, saha wadwa prajurit Kasi nagara, reh sang ratu Malawa.
32. Sampun pisan kawastanin sisip, ngalih mantu ratu lian-lian, tan saking kalugra wite, kocap Sang Dasabahu, sasampune manggih sang putri, nyembah mangrangkul pada, egar semunipun, nanging kari mantra-mantra, ring mata kadi wau wusan nangis, samangkin mimbuh raras.
33. Arya raja putra ngandika aris, kadi kanten kadi kasedihan,
"Punapi dadi wiwite, ri antuk beli rauh, nyadia nyambut ngajak ka Kasi", sang putri manggelisang matur "Ratu sampun, banget-banget salit parna, kaulane wantah wit teher subakti, magehang kuna-kuna.
48b.
34. Krana kaula kaaksi sedih, wiwit antuk baos kalih pasal, kapisan inggih tekane, ratu Magada prabu, boya pisan kaula sudi, katiba ring wong lian, i bapa kadurus, mragiline ring kaula, inggih-inggih yen i bapa keni napi, antuk ratu Mageda.
35. Rahina wengi kaula sedih, nyadia wantah kasuduk sarira, yen kadurusan rauhe, ratu Magada prabu, miteherang nyadia mangambil, maring awak kaula, tui tan sudi pituhu, sedihe masa pisan, reh solahe i bapa karangkung sisip, lali ring pagustian.
36. Ngrereh kanti tan nguninga i gusti, rasa rahat praya kasisipang, sapunika sujatine, mangkin kaula ratu, sida ngaturang pati urip, sakenak pakayunan, mangdoh purun-purun, kasampura kapidanda, kaulane rebah sapisah sairing, reh eling makaula".
49a.
37. Laris nguntul Dewi Priyawati, mijil waspane tan papegatan, Sri Candra Singatmajane, kadi kalantug kayu, sek kayune nyingat sang putri, milu marawat waspa, rangkung kangen tuhu, nyingak putri ayu raras, kasedihan kadi rasa Dewi Ratih, katinggal Sang Hyang Semara.
GEGURITAN PURWA SANGARA - 14
209
