6. Laris Sang Pandawa sami, miwah Sang Putri Pancala, medale saking keraton, Sang Yuyutsu mengaterang, miwah Begawan Kerpa, kandikayang tulak sampun, pawaline kasedihan.
7. Gelisang carita kocap mangkin, lintang wawengkon negara, Sang Pandawa pamargine, miwah Sang Dwi Pancala, anak raja Drupada, jag wenten sasiki asu, mangiring tan kesah-kesah.
26b.
8. Salampah laku mangiring, tan karuan pengrauhnya, krana papitu sarenge, pamargine mangalerang, laris mamanggih tukad, rauh ring sebaler gunung, pamargine manganginang.
9. Rauh ring pasihe kangin, laris wenten keaksi ngandang, Sang hyang Agni pesengane, ngandika ring Sang Pandawa, tur laris ngangkep raga, lamun Sanghyagng Agni tuhu, sane pecak katurang.
10. Geseng alas duke riin, ring alas Kandawa wana, antuk Sang Kresna Arjuna, "E cening Sang Dananjaya, yan cening mangidepang, ento gandewa patut, uliang ring Hyang Baruna.
11. Ne madan maha Sudi, sawireh tuara gawennya, ring cening praya mangangge, kadi cakrasudarsana, tan padon ring Sang Kresna, suba ilang pinah ilu, krana gandewa punika.
12. Suba wenang serahang cening, ring ida Sanghyang Baruna, sawireh tan pakenoh, kagambel ring Sang Pandita, wiku ngewanawasa", Sang Arjuna rangkung nuut, laris niwakang gandawa.
27a.
13. Tiba ring toyaning pasih, ida Hyang Geni karenan, Sang Pandawa kocap reko, pamargine mauderan, ring tanah Bratawarsa, mangelodang raris rauh, ring daksina segara.
14. Laris mangguhang malih, kanten pecaking negara, jajahan Dwarawati, nanging marupa segara, ngarudug maombakan, kanggek Sang Pandawa ngungun, eling ring Sang Batara Kresna.
184
