30. Miwah tetunggule taladwaja malih, tetunggule raja Baladewa, malih tan kari kaamet, ring widyadara sampun, krana susah sang Yadu Wresni, ngatonang durmanggala, laris sang sinuhun, Prabu Kresna Baladewa, manauhang ri sang watek Yadu sami, arsa lunga masiram.
6a.
31. Maring prabasa tirta pasisir, nglila-lila tur sampun sayaga, dabdaban praya lungane, gajah kuda makumpul, rata sampun cumadang sami, praya matirta yatra, sregep sami cukup, katekaning pasesanguan, wadua katah kadauhan praya ngiring, len dadi juru sandang.
32. Dedauhan sane ring jero puri, sampun praya ngiring samian, sakatah para istrine, rabine sang sinuhun, kanjeng susunan Harimurti, pramesuari tetiga, sami putran ratu, miwah putraning pandita, pangajenge maparab dewi Rukmini, ana raja Bismaka.
33. Ratu Ajeng ring Kundi negari, malih pramesuarine panengah, Satyabana peparabe, masih putrining ratu, anak maharaja Satyajit, pramesuari mamuntat, putrining sang wiku, sang Kapijambawan, peparabe pramesuari Jambawati, ibune Arya Samba.
6b.
34. Sajawining tiga pramusuari, rangkung katah prerabi punika, yan sami cacak wastane, rabine jeng sinuhun, maharaja ring Dwarawati, mangda pisan cutetang, gebogane itung, kojaring Mosala Parwa, cacakane samian kanembelas tali, rauhing padmi tiga.
35. Sane mungguh soring pramesuari, katahe limang tali ping tiga, mawuwuh sanga atuse, nanggu sia dasa pitu, sami kadaden widyadari, saking Wisnu bawana, krana sami ayu, katah patih lengkiang-lengkian, sada panjang pakirene muluk manis, alise tadah punah.
36. Masih katah sane nyandat gading, raga singset tadah sada kenyang, sada akas bebalunge, aksine masih nyunyur, nanging matra gala amanis, pantes juru panggoda, lampias turin pangus,
156
