40. Kagambel antuk sang Dyah, jati ngawuwuhin bangkit, warnine angayang-ngayang, Ida Sang Sudesnawati, Sang Putri Bhoja nagari, mangun ngresres pakahyun, sadaging sang ing jro pura, malengok pada mabalih, crita ditu, watek para Tanda Rakriya.
41. Sang sanekandikayangituni antuk Nrepati, ngrusakang bajra punika, sinamyan pada jerih,, sami medal saking puri, mangrudugan saling kaplug, den ing jerih mangantenang, ring andus ipun i geni, jag malepuk, nempulek mukel-ukelan.
42. Tejan Ida Sang Hyang Surya, waluya kadi saputin, kaplektatan pamanah, engsek bengong sami jerih, sawatek ing bala mantri, waluya sagara mancuh, risaksana sepi suniya, maplekes tong pesu munyi, kala sampun, angine punika ical.
43. Sakaden ing wong jero pura, saling pamalunin ngambil, ngambil padrebenya pada, reh ring manahnyane sami, narka tatan wurung basmi, sapuri telasan puwun, sapunika panakanya, den ing paglatur mangkin, pada ramug, pasulambah masasaran.
44. Lian misaratang medal, majalan ipun malaib, catur dwarane keselan, den ing sang sane mamargi, waluya kadi amberin nika antuk ruwang ipun, kaselan yan pacang medal, wenten makaplug kajepit, lian ditu, ngecogin panyengker pura.
45. Crita Sri Bhoja Nagara, wyakti Ida tatan gingsir, pageh kahyune tan marsa, ngaksi tingkah wadwa jerih, Resi Paradwan nyarengin, Sang Tapasa ngiring ditu, lan sang andeling pura, makadi Rakriyan Apatih, Sang Prabhu, alus Ida mangandika
46. "Duh dewa sang atmajiwa, durusang ledange mangkin, dewa Sang Batur Tapasa, bawos tiange ne mangkin, manah tyang sapuniki, majeng ring i dewa tuhu, inggih yan ing katrusan, sweca ring tyang ne mangkin, nanak Galuh wantah katur ring I Dewa."
150
