18. Reh sampun ngedas-rahina, gagison raris mamusthi, padangelus lalekasan, irika padangalesu, sampun malih kadi suba, sang trini, ka pancoran masucian.
19. Wus masuci magagandan, ambunyane mrik minging, manyujur mantuk kapurian yan panarkane ring kahyun, sang Prabhu jati tan wikan, ri antuk ing, lintang becik sirep Ida.
20. Sang Dyah ngambil sulendang, makampuh raris aguling, sirep ring sanding sang Nata, kadi Ida Sang Prabhu, Ida Prabhu Aji Dharma, manguraris, rabin Ida kahuluran.
21. Jantos sampun dawuh sapta leplep sirep sang Trini, kapahyun de Sang Nata, reh saking maswe sampun, tan polih mabhukti mangsa, kaslagin antuk karya pakeraban.
22. Mangkin sampun polih laba, sinah lesu turin arip. krana sirep leplep pisan, raris katanginin sampun, sang Dyah wawu mungwa, ngusap aksi, sawang kadi kalesuan.
23. Smitan cingake ngamirah, nalepdep, tur nyunyur manis. numbuhang smara tunida, glis ing carita Sampun, rawuhe saking masiram, Sang Nrepati, raris Ida mangandika.
24. "Duh mas beline i mirah, ada jani rawos beli, pikolih beline nidra, ipian beli tumben luhung, rawuh Hyang Bhatari Durgha, nganugrahin, nering adi kapaica.
25. Ditu reke di pasuryan, ring kempu pasuryan adi. "Sang keni dawuh wecana, sami reke pada mantuk, sarauhe ring puryan, kahambunin eban watang ngasirsirang.
26. Pada mangambil pasuryan, nuli kahungkabang sami, madaging ati lan limpa, lyan madaging pupusuh, nanah banyehnya maliyah, mauled sami, brek ditu pacarongkak.
130
