7. Temah Ida Sang Pandhita, Ratu titiang, kudang dina titiang nganti, jantos tigang dasa tahun, malih lintang tigang wulan, titiang neda, sarwa mangsane puniku, krura ngulurin tamah, marupa macan nyejehin.
8. Mangkin sampun titiang purna, lega pisan, manah titiang de Sang Aji, tan wenten panebas katur, swecan ratune ring titiang, nyupat papa, mangawaliang kadi dangu, wusan titiang kasangsara, mimitan titiange nguni.
9. Kalan ing ngelang-lang kalanguan. Ratu titiang, rawuh ka swargane riyin, polih nglangkahin sang Bhiksu, rika titiang tur katemah, dados macan, magenah ring alas agung, inggih niki dewek titiang, ne marupa macan riyin.
10. Belulangnya ambil punika, samaliha, abut caling ipun raris, makadi kemitan iku, katur ing Sang Naradipa, nggih lanturang, yasan palungguh Sang Prabhu, titiang ndaweg pamit budal, ka marabhawa mangkin.
11. Sapunika atur Ida. Citragotra, muksah ri wusning ngabakti, katinggal Ida Sang Prabhu, kakupak caling i macan, mangelodang, pamargan Ida Sang Prabhu, sakancan tirtha utama, sami pada karawuhin.
12. Kasusupin sinamian. tur masiram, masuci laksana raris, manuwut rejeng ing gunung, irika nuli kacingak, pasraman. nanging sampun sepi samun, katinggal antuk Sang tapa, balenyane pungkat sami.
13. Kakaput kabang kakawa, kalumutan, sakadi ngapiwolasin, pungkat tan maunduk ditu, kapakahyun de Sang Nata, kakawiyang, luya nagarane uwug, katilaran ban Sang Nata, saksana rawuh ne mangkin.
122
