61. Sri Aji Dharma ngeb mangaturang sembah, ngelut pada sahatangis, nggih Hyang Guru mawecana, singgih Ratu, Sang pandita, daging ndaweg ampuranin, Ratu titiang, memargi i tambet mangkin.
62. Sapari-laksanan ika jugulan, nunas waralugran jati," Sang sinuhun mawecana, "Punapi pisadyang nanak, tan dadi bapa tan asih, sinah sida, bapa pacang managingin."
63. Sari Ari Dharma mangadpada nyumbah, tan lian sane kahapti, manunas waralugraha, kang Aji Samadi Krama, uning ring sarwan ing munyi, sarwa mambekan, kancan ing sarwa parani.
64. Tur nyidayang sida pacang masusupan, ring kancan sarwa gimitip, malih ring kancan pawakan," Sang Hyang Guru mangandika, "Nah sujati sida sidhi, ring tungtung lidah, ditu surat bapa cening.
65. Suba mungguh di tungtung lidah nanak nging ada kaketah buin, panugran bapa ring nanak, ede wera ring sang lian, apang cening ne mamingit, yan wera, tan wangde ngawanang pati."
66. Sapunika wacanan Sang Nagaraja, Prabhu Aji Dharma ngiring, ri sepi wus kawisikan, mlecat Hyang Nagaraja, mangkin tan bawosang. malih, crita Ida, Sri Prabhu Dharmapati.
67. Sane mangkin luya kawewehan, amretha wisya ring ati, karahatan ing duhkita, kasangsara kulangunan, jantos mapalih ne mangkin, kahyun Sang Nata, punika sane ngawanin.
68. Madabdaban Sang Nata pacangan budal, ka karang kaputren manjing, mamargi nyujur ngapuriang, mapakayun nemwang rasa, ring pamreman lawan rabi, tur kanggek Ida, ring ajeng song semut mangkin.
69. Reh kapireng swaranya nyerit masuryak, meme bapa braya wargi, pisaga lawan pawitra, mapiakan jak makejang, eda disisin songe nengil, luya nyalang, pamargan Sang Narapati.
