53. Reh sangsaya sajron ing pakahyunan, katangeh Sang Prabhu sisip, nika krana kahandegang, nging Sang Nata ndatan arsa, sampun ring bancingah prapti, tur kacingak, Ida Sang Pandita lewih.
54. "Nggih sobhagya Sang Pandita ledang prapta, titiang saksat sampun manggih, kaletuhin ing solah, den ing titiang mahuninga, ne ring krama sila yukti, ne mangkin satsat, niki titiang malih murip.
55. Janten ayu dening titiang mamangguhang, pangrawuh sang Wiku suci, den ing adnyanane sukla, becik ida lugrahin titiang, mangde tan salantang urip, mamangguhang, parisolah, ne tan becik.
56. Nggih punika tan sida wyakti purna, ring manah titiang wyakti." ne mangkin sang Nagaraja, kadi ketus kahyun Ida, ri wawune mamiharshi, pamuji Ida, Prabhu Aji Dharma lewih.
57. Glis nimbal Ida Sang mraga Pandita, "kangen manah bapa cening, cening twi putran bapa, saja dewa twara nawang sawitran cening punika, Sang Nagaraja, twi cening tandruh jani.
58. Teken bapa reh bapa marupa satwa, nging wit dewata jati, ento twah ne ngawanang, bapa bisa nyalin rupa, sida asingasing kapti, yan basowang, ada makacihna jati,
59. Cihnan bapane ada manik utama, ambul taluh angsa patis nah ambulto gedenya, to dadi uparangganya, mungguh tungtung ikuh nguni, nah ne tarima bahang bapa ring cening.
60. Makajalaran kasidan sakabwatan, pikolihin bapa cening, purnayang kahyun i nanak, paringring pakahyun bapa, cening maripurna jani," kala punika, yatna sira Sri Aji.
103
