12. Saur manuk sandikan cokor idewa, titiang manunas mapamit, raris sami budal, ka catur mapangarah, rahaden kari katangkil, arya lan kyadi pati.
13. Sira demung tumenggung lan sira demang, kanuruhan mamangkil, ki patih ring arsa, rakrian patih matura, titiang sapunapi enjing, lunga tan lunga, lan kaulane sami.
14. Raden Mantri ngandika tan padon pisan, yan majalan ne mani, panjake makejang, depang san uwa jumah, ratu jajarahan sami, majalan onyangang tuara kari.
15. Nene jani majalan petang bekelan, kapalane mamargi, I Titit angedap, I Meganjalantara, I Ujan Ngaritis mamargi, I Maret duta, saha rencange sami.
16. Sira patih matur saha wot sekar, titiang manunas mapamit, titiang manauhang, sakadi pakayunan, Cokor idewa ne mangkin, manggut rahadyan, wus ngaluaring tangkil.
17. Sami budal rahadyan sampun ngadatwan, kocapan sanga patih, akon mapangarah, katuju nene lunga, sami pada sukengati, punggawa patpat, saha balane sami.
18. Tan kocapan ring dalu benjang kocapan, punggawa wus cumawis, titib di bancingah, sami ngangge kawotan. tekaning busana asri, yan kawaspada, tinon luir gunung sari.
19. Palinggihan kuda liman muang padatya, onta muang bala sami, mangebekin marga, sregep ngawa sanjata, sasikeping wong ajurit, ndan kawarnata, mangke rahaden Mantri.
20. Sampun ahias mawastra wijil maperada, makampuh sutra putih, sinembar perada, asin madestar petak, masekar pucuk mapilpil, magelang kana, makeris landian danti.
21. Tur maselut nila lan ratna pangkaya, kakandelan mas adi, tinon ngeresang cita, tulen ratuning wanda, warnane tan papakering, tur makalpika, masoca ratna aberit.
22. Sampun mapamit ring aji lan biang, sang nata ngandika aris, mas mirah ibapa, gusti apang prayatna, inggih sandikan bapa aji, raris manyembah, ring yayah lawan bibi.
104
