VIII. PUH DURMA
1. Duh mas mirah ratu mas atma juita, kalingane i manik, jim ka manusa, ne mangkin satuhunan, yan ica i mirah manik, titiang mamakta, mantuk maring nagari.
2. Ring Nusambara reke panagaran titiang, titiang putran narapati, mung titiang kewala, lanang amung sanunggal, wenten kakanti titiang istri, sampun kakutang, ring pulo Mas ne nguni.
3. Dening kakutang keraos ngaletehin jagat mijil titiange buncing, titiang ninggal desa, misadia ka pulo Mas, mangambil dane yan kari Ni Sekar Kancana, sabdane mijil aris.
4. lnggih ne dumun kalaning titiang mentas, irika di Giliadi wenten para putra, saking Ambaramadia, titiang ngiring sapati urip, duhka nastapa, titiang tan malih kapti.
5. Yan beli durus manjakang jadma papa, titiang lintang sairing, yadin jele melah, mangandika rahadian, duh ratu yan durus asih, nunas gelisang, ka Arribaramadyeki.
6. Raris mamargi ida adeng-adengan, ngambah ka alas ukir, jurang gitgit tegal, lebah saking mamarga, wus pitung dina di marrgi, tan manggih desa, nengakena tuan Mantri.
7. Kacarita mangkin Raden Megantaka, di Malaka nagari, sampun polih orta, ne nginggatang tuan dewiya, Rahaden Ambarapati, Ambaramadya, nagarane tuan Mantri. 8. Ne mangkin sampun waluya di nagara, merange tari gigis, Raden Megantaka, mangandika ring cita, ne suba tuara nandingin, yan di payudan telas punang nagari.
9. Kakalahang tong ada magut ban yuda, aku mantri linuih, wanen gung prakosa, sakti tuarada pada, teka ada anak bani, congkah cumangkah, rahaden nabda aris.
10. Wiramanggala kaka Wirakalana, lan kaka Wiragati, Ki Wiralanglangan, aku lunga ne benjang, mangelurug punang nagari, Ambaramadya, kaka pada pradangin.
11. Uli jani pada konkon mapangarah, kaka ka desa jim, apanga katogan, ratu jim majalan lan ratu Tatar lan Tebih, ratu ring Besah, apanga kerik tingkih.
103
