Kaca:Cokorde Darma (Don Quixotte Versi Bali).pdf/48

Saking Wikisource
Kaca puniki kavalidasi

Cokorde Darma


nyuling. bungut botol elepa ulian manahne lega kalangkunglangkung. wireh inget teken dewekne buin kejepan maan jejarahan gumi. Ditu ia dadi Ilion besor. Kayang somahne lakar mawangsa dadi wangsa Gusi Merenjing, tur tuara buin nyuun sok bodag ngaja kangin kemo mai nglinderin desa luas dadi pangalu. Jani dadi pangiring ksatria jeg aluh pisan asanne. Sai-sai basange betek empugan.

Matur I Sadara nyelag.

"Titiang tuara ngrereh sakit. Sujatinne lintang nambet nanging titiang durung buduh. Nyelap titiang ngalih perkara. Yen tuah dadi ajerih arepang titiang."'

Wau kenjek asapunika, kocap wenten pandita kekalih mamargi mapajeng robrob. Ring pungkur wenten anak mamargi kekalih wong lanang, ring pungkurane wenten dokar muat anak istri. Makasamian punika mamargi marerod tan wenten pada uning sira-sira. Sri Jayati ngandika ring I Sadara.

"Iwasin ento para putrine lakar kajarah ulian baan momonne. Ne jani mara nira nepukin musuh. Eda ulik nyen cai nulungin icang, nah!"

I Sadara durung nimbal, I Cograh kagertak gelis. Wus tampek lantas ngencot manreren, Cokorde Darma ngraos merintahang.

" Ih , Cai triwangsa nista! Uled gumi! Menak mangletehin jagat. Yan iba tuara ngulihang ento sakancaning para istrine. bangken ibane nyrérot. Kai ksatria kasub, Sri Sudarsana pesengan kaine."'

39