ADIAYA IV
MAYUDA MANGLAWAN UNTANG-ANTING
Awinan pamarginé matulak budal, pakayunan idané mawawanin kengin pacang ngambil pasangu miwah nambanin pinggangné sané beseh agigis miwah sadia ngupahin iringan aukud. Kapilihin I Polo Udang, panyeroan berag tégrég, tulang igané gridig tulén gendér wayang, mabangkiang lengkiang krana kapah kena nasi.
I Cograh uning ring solah pamarginé sané matulak mulih ka purian. Tuara kapecut, macedut, nglaut ngacir ka pangedogan jaranné. Basangné suba layah tan perah. Wiréh uling ibi tuara ngamah pamor bubuk, basang bedak tur layah, ento makrana ia pepes ja pajalanné nglayut nyeréot nagih bah ka samping.
Rasa kangen I Cograh ring gustinyané tan kalintang ban anteng pisan. Gustinnyané pepesan nepinin ia madahar sampun. Isin awak I Cograh saja-sajaan suba telah, nu kulit pangaput tulang kémanten. Mula sujati asapunika, wiréh sotaning buron tulya kadi barang idup tuah patut pesan baang ngamah apang makeloan idupné. Kéto ané sujatinné, mangda stiti tan pralina patut pisan rerehang oot muah padang! Nanging, jani I Cograh kénkén?
25
