200. Mangarepin bokor emas, misi slongsong emas kawangi, sarwa sekar maturutan, praya mangaturang bhakti, maring surya mapasaksi, mbakti ring teg-teg agung, Ceker Cipak mnek matatah, Ni Saroja masuk kaloji, ngembus pusung, raris nyapa nyama braya.
201. Inggih meme mbok samian, titiang ndaweg matru sisip, saking tuni tan karunguan, raris mlinggih sami kidik, canang lanjarane raris, durusang wedangin dumun, anggen katambetan titiang, wiaktian titiang kantun alit, tuah pituduh, matemu paturu nraka.
202. Titiang nunas picehan mbok, mkadi meme-meme sami, momot mapiceha ring titiang, mangkin soke ampehang angin, keto pamunyinnya manis, sambil mangisinin biu, asem-asem miwah jaja, nasi muang ulam akawis, padha patuh, isin soke suang-suang.
203. Ni Seroja mituduhang, inggih bapa niki mangkin, rerehang genah pasanggran, mangda miyidan akidik, gumentos katuran linggih, rarisang dabdabang sampun, nyantosang wus matatah, Ni Seroja ka sanggah raris, ratu dayu, linggihe dumun aturang.
204. Munyin gendere ngarempuang, dalang gedoge manyrit, ada mapunduh ngamalat, ngawilet miwah makawin, ida sangginge natahin, sampun manyuratang bungkung, tatah pangotoke nroktak, kikir sami mangan ceping, glis puput, sunaran gigi nguranyah.
205. Tuah ngawayahang karat, matlek kemikane bangkit, ada manatakin peras, pangutike kaenjekin, sampun uwus kaayabin, I Cipak mangkin tuwun, ida sangging sinanggraha, prabot sami sampun tangkid, rarais mlungguh, katuran asem-aseman.
206. Ada mangayahin dalang, nymak banten miwah suci, ada luas pacang maturan, pajeg prangkate ka puri, ada ngladang banten pajati, nasi baleyane kasuwun, pacang ka umah jro sdahan, slam kapir padha misi, sampun puput, tlung
86
