20. Sang wirosa ujar jengis, nto nguda nresnen i ubuhan, yan tan banget jua edane, bangken cicing bakat supat, nah suba dong jag bayah, aji seket ede liu, Ceker Cipak mabayahan.
21. Asune mangkin kaambil, Ceker Cipak kabiaparan, i sona mateteh-teteh, mangkin lawut kapandusang, yeh tinghale mecapcap, dumadak ja iba idup, kai ngubuh kayang wekas.
22. Ceker Cipak raris mamargi, negen meyong miwah sona, gleang-gleong di margane, irib kadi jadma edan, tan sah masasambatan, ngame Ida Hyang Sinuhun, sarwi nunas krahajengan.
23. Tandwa mangkin prapti, ri pinggiran wana siteb, tan bawos madurgame, taru agong pajulagjag, kenas galak ana ngkana, tan dumadhe raris amangguh, anak manigtig i ula.
24. Ula selem nyelep malengis, kocap cucunnagha gombang, salahnya manda bebek, kacakcak ya nganti gayal, Ceker Cipak ya nyagjagang, nguda keto dewa ratu, sampunang jua ngmademang.
25. Sang wirosa sawur nengkik, data-data jua dabdabang, lalipi tong dadi leklek, sajawining jlema ubuhan, tani gawe jua gawenang, mapi-mapi cara sadhu, cara ngimengang kadarman.
26. Ceker Cipak alon nyawurin, titiang nunas pangampura, mitang saledang-ledange, maluya manunas jiwa, niki tiang ngaturang jinah, seket sat panumbas ipun, mangdan sampun ipun pejah.
27. Sang (wi) rosa sawur kenying, tuwi tuah buki keto, edengang pipis caine, icang lega yan mapituas, neh cai suba nyuang melahang ya ditu ubuh, tainne anggon mubadan.
28. Ceker Cipak mayah ne mangkin, tan gila ngambil ula, kapenpen maring beseke, tumuli raris majalan, pamargine tan tolihan, beneh kaja ngucung-ucung, matrayudan mategenan.
29. Irika raris amanggih, janma kueh maseliweran, pacarungung di carike, takeh cara mauderan, ada padha manyajagang, wastu kanten nguber bikul, Ceker Cipak manesekang.
65
