wah surya analangan, wyakti titiang tuhu sadu, wyadin tenem tanpa toya, ening jati, ngungsi swargan sarin bhuwana.
33. I Wiranata semu wirang, pedih anggon manyawurin, beli tuara liu rawos, jani majalan katemelung, Raden mantri raris budal, kaget prapti, I Patih praya mamwatang.
34. Anuli raris anembah, pakulun sang maha dewi, I raka mangutus titiang, sampun ratu nyalit kayun, pamidukane ring titiang, lwir sasarwi, langgya ring nagara puspa.
35. Inggih titiang manguningang, I Ratu katuran mangkin, mamarga kalase wayah, titiang mangiring i ratu, I Candrawati angucap, bapa patih, I Cang tuara pacang tulak.
36. I Candrawati anembah, ring sang ibu prameswari, wantah gantin titiang kaon, matilar ring yayah ibu, sampun mreta titiang pejah, titiang pamit, sapisan ring ibu yayah.
37. Riwekas titiang nutugang, yan pinih titiang mawalik, tumitis manadi jadma, irika titiang manawur, ne mangkin kocapang titiang, mangletehin, mati makutang ring alas.
38. Sang prameswari ngandika, tan pagatan ya manangis, Candrawati anak ingwang, lalis saja twah i ratu, mararama teken titiang, mangalahin, ajak titiang bareng pejah.
39. Pacang napi tyang kariang, apa ne tresnain dini, payu sedih mapangenan, I Candrawati umatur, sampunang ratu sampunang, sedih kingking, kari angen teken titiyang.
40. Duh ratu pisan puputang, titiyang nunas bekel mati, wastra cerik ane petak, pacang anggen titiyang kudung, kala titiyang kepanesan, ne ring margi, irika ring Panangsaran.
41. Sang prabhu nangis sigsigan, nyelsel raga ngasih-asih, Duh mas mirah atma jiwa, yan i ratu sampun puput, alih ko titiyang gelisang, ajak mati, titiang maniring i dewa.
42. Wereg rawose ring pura, saisin purine sedih, manangis ma
22
