17. Aduh adi dewan titiyang, da iju salah penampi, beli banggi maguyonan, sakeng demen ngulgul adi, tuwah saja beli pelih, curigane tidong patut, eda sanget ngabe sebet, nyanan adi sakit hati, adi ayu, satsat merta sahidupan.
18. Wireh suba lingsir sanja, jalan jani adi mulih, nah ento sampine dandan, gatiyang gigis nututin, beli lakar mangarit, kranjang padange nu puyung, engsap mati mara inget, sinoman suba ngorahin, swaran kulkul semeng mani mapaderep.
VIII. PUPUH PANGKUR
1. Kirang langkung kalih wulan, Nyoman Sekar mangidamang woh boni, sampun marawat ring susu, wetenge sayan ngedenang, warna seming, kecud kuning kembang layu, pajalane makeruhang, lesune rasa tan sipi.
2.Rikalaning sasih basah, kulu pitu hujan angin nibenin, tegal sawah lancah blabur, sarwa taru mahogaran, linus angin, tembok balbal pondok tuduh, dingine nyusupin tulang, metu ngawe lara hati.
3. Buka katrimayang titah, Nyoman Sekar dadi lasya manyakit, medal rare istri ayu, makulit kedas nyalang, jelih manis, I Umbaran semu buyu, rarennyane kilas-kiles, tur kasangkil kacangkrimin.
4. Duh ratnayu cening bapa, jemetang Luh eda pati mangeling, meme bapa tragya ngempu, ngenemin peteng lemah, mondong cening, apang lanus nutug tuwuh, legayang bareng neraka, magarang don dagdag kuning.
5. Sat cening panatas jalan, kwangen bapa lan meme tuwah cening, kewala cening da tandruh, ring dane nini lan pekak, sareng kalih, lingsir cening suwe mantuk, palingihe bina genah, maring setra gandamayit.
6. Bapa jani ngawit marab, cening ayu madan Luh Putu Sari, jangkayan sekaren layu, ngeredana sarin sekar medal manik,
149
