kangen saja beli nolih, bareng tuyuh, nyemuh kulit magarapan.
10. Apang Nyoman tatas nawang, ring duwen anake lingsir, ne dogenan akecoran, teken kepala asiya wit, kenken jani ban ngitungin, pawone apang makudus, tan ngempang-ngempang manyakan, kulit lisut berag arig, muwa cekung, cemal-cemil kirang pangan.
11. Ni Luh Sekar alon nimbal, pangecape halus manis, arah beli nguda jejeh, cingak ipun i tetani, tuwi masikian malit, nyidayang ngebahang kayu, ento nyandang anggon tulad, dasarin manah sujati, swasti astu, sida ngamangguhin merta.
12. Mertane nora marawat, yan tan sarat ngaruruhin, keto jua sujatinnya, angganin kadi petani, ngaluluh tanah sai, mangda gelis mupu pantun, tan, ngeputang batis gatel, peteng lemah kagagasin, wastu berung, bonyok bengu makebetan.
13. Ngiringke mangkin dabdabang, amongane sigar kalih, beli makarya ring bangket, titiyang jumah manandusin, prade wenten genah embang, sampunang lali nandurin, bayem tuwung, tabya tomat lan kekara.
14. Sotanin dadi manusa, suka duka twara lepih, yan pet makardi sentana, kayune malipet kalih, yaning ngeka kakalih, sakite janten tetelu, ngiringke wilangin sareng, becik pinehin ring hati, mangda sampun, nyelsel raga riwekasan.
15. Papineh adi tan timpang, suka beli manututin, nanging ada pangaksama, paceket beli ring adi, bungane mawarnarni, di amben gedong ngarembun, eda adi ngalewara, apenin apanga mentik, beli buduh, kapingon ngantenang sekar.
16. Eda beli sangsaya, teranan titiyang tuhu jati, nenten ngamonyerang awak, dening sampun duwen beli, je melah deruwenin, tambet titiyang beli ngukub, ledang ugi ngamanjakang, saenun titiyange urip, beli bagus, nguda dados salah takeh.
148
