matinggal, elom kangkung kaonekin.
4. Nyoman Sekar sayan bingut, rasa engsek maring hati, ngangseh ngegarang manah, I Umbaran kedesekin, sedek nguntul ngurik tanah, manyongkok di bucu mati.
5. Punapi beli manguntul, napi minab kakobetin, yaning wenten kakirangan, panyembraman adin beli, ledang ugi ngampura yang, tambet titiyang mangayahin.
6. Yan nenten munggah ring kayun, sat mangisep tebu manis, prade banyunnyane telas, sepahang mangkin i riki, bang yang dados panyekjekan, tong nyandang sungkan mamargi.
7. Dumadak beli rahayu, panjang yusa lila hati, magelaran Dananjaya, micundangin para istri, I Sekar pamucuk tumbal, kaping sapta manumadi.
8. Kadi manggang ulam yuyu, I Umbaran barak biying, jengahe saja makrana, semune kadi kabilbil, nyaledetin, Ni Luh Sekar, tur mangucap nehes hati.
9. Nguda adi salah sengguh, pangajume manis pahit, ngayunang baan kekatang, pegat tali labih beli, tan urungan kasengkalan, masih adi karepotin.
10. Nemonin sasih kacatur, nora ada hujan angin, nadak karoda Hyang jagat, nibakang kilat lan tatit, jagat erug taru lata, beli lara nandang sedih.
11. Umpama manyepel madu, tuhu manik sanjiwani, madu derawa pinangan, meled layahe ngecapin, anggon beli rerambangan, manise sai ngenyudin.
12. Ni Luh Sekar semu guyu, manah nyane galang kangin, maningehang pepasiha, muluk manis ngelus hati, lindung paling bubu enyah, bulane saget nagarin.
13. Yaning beli yukti asung, malih pidan kerangkatin, mangda nenten magabengan, kadungan malali api, ngantos kembung jari tangan, sira pacang manambanin.
145
