8. Da marekak mokak mapi paling bisa, yadin cening saja ririh, mabanjar pisaga, jawat makakantenan, eda jail ngawe runtik, rukun mabraya, ento jejerang di hati.
9. Yan doyan mabibih jalir ngucap timpal, rumasat maboreh bacin, ibuke tan pire, dulege ngebekin tangkah, metu brangki nyakit hati, parune rusak, ngareges ngutahang getih.
10. Prade cening mamangku pangemong desa, dalihan drama saringin, tetes apang nyata, anggon dasar pelaksana, ane timpang pituturin, apanga resep, teken madan daging dresti.
11. Nyujur patut carane pada malenan, kala patrane pedasin, mapan gumi linggah, ada kene ada keto, lengkong nyane kapayasin, leser katanem, rumasat penjor upami.
12. De cening manguyeng gagitik gedenan, tau teken kasungkemin, nyumbungang berana, nyama braya samah mela, setata mengalih elih, ngagen nyepekang, teken anak tan pawargi.
13. Pangidrajala singid tur kagelarang, sat macan matapel kambing, setata mamangsang, dadi momok di pakraman, mangulahang lega hati, asing jegegan, iseng nagih kagundikin.
14. Ento madan jatma nista tan tirunan, tuna asih tuna budim tuna pangarasa, tan ngeputang palakarma, asin dadi butabuti, asing lengahan katadah saling rebuti.
15. Dresti gama anggon dasar ngiket krama, catur wangsane suluhin, da murug sesana, manyaru nganutin masalokita apanga pasti, tan bina dagang, pocol lan bati petekin.
16. Jele melah madasar baan ucapan, laksanane jwa suluhin, angganin ala tandur mupu baya, ento ne ingetang sahi, incep di awak, rwa binedane pinehin.
17. Sangkan ada anak kanti kasepekang, mirib iya dusta budi, ngawe dura cara, merihang tan pegelahan, ngapak-apak ngeracinin, ngalingga caya, nyetik nesti ngawe gering.
139
