[᭑᭗᭕ 175B]
᭑᭗᭕
ᬮᬕᬸᬢᬾᬓᬕᬸᬕᬸ᭞ᬗᬮᬶᬄᬲᭀᬫᬄᬚᭂᬕᬾᬕ᭄ᬕᬮᬶᬂ᭞ᬢ᭄ᬯᬭᬫᬢᭀᬮᬶᬳᬦ᭄᭞ᬫᬤᬦ᭄ᬤᬦ᭄ᬲᬫ᭄ᬩᬶᬮᬂᬗᬸᬦ᭄ᬢᬸᬮ᭄᭞ᬫᬧᭂᬮᬾᬄᬗᬾᬤᬾᬗᬂ᭞ᬓᬲᬤ᭄ᬬᬦᬾᬦᬸᬫᬶᬢᬶᬲ᭄᭞ᬓᬤᬾᬦ᭄ᬢᭀᬂᬳᬤᬍᬯᬶᬳᬦ᭄᭞ᬳᬶᬓᬾᬓᬾᬃᬗᬯᬸᬓᬶᬦ᭄ᬳᬶᬓᬶᬬᬸᬄ᭟ᬳᬶᬧᬾᬢᬸᬜᭀᬗ᭄ᬓᭀᬓ᭄ᬧ
ᬤᬶᬤᬶ᭞ᬓᬧᬶᬗᭀᬦᬦ᭄᭞ᬩᬤᬸᬳᬸᬃᬫᬭᬶᬂᬓᬬᬸ᭞ᬢᬓᭂᬳᬾᬫᬫᬸᬢ᭄ᬭᬸ᭞ᬗᬸᬜ᭄ᬘᬭᬂᬯᬾᬤ᭄ᬥᬦᬾᬧᬶᬗᬶᬢ᭄᭞ᬦᬵᬗ᭄ᬳᬶᬂᬲᬓᬾᬂᬢᬗᬃ᭞ᬫᬧᬶᬮᬶᬄᬬᬦ᭄ᬦᭂᬥᬤᬳᬸᬦ᭄᭞ᬓᬦ᭄ᬢᬸᬦ᭄ᬓᬸᬦᬵᬥᬶᬓ᭞ᬩᬸᬤᬂᬩᬤᬶᬂᬳᬶᬮᬶᬗᬶᬦ᭄᭞ᬳᬚ᭄ᬭᬶᬄᬦᭂᬥᬤᬳᬸᬦ᭄ᬩᭂᬤᬄ᭞ᬫᬩ᭄ᬭᬢᬫᬫᬶᬮᬶᬳᬶᬦ᭄ᬲᬗᬸ᭟ᬯᬶᬢ᭄ᬘ
ᬫᬭᬢᭂᬫ᭄ᬧᬸᬄᬳᬗᬶᬦ᭄᭞ᬫᬳᭀᬬᬕᬦ᭄᭞ᬧ᭄ᬭᬦᬫ᭄ᬬᬳᬶᬦᬩ᭄ᬳᬶᬧᬸᬦ᭄᭞ᬳᬬᬢ᭄ᬧᬘᬂᬫᬵᬢᬹᬃ᭞ᬕᬸᬫᬦ᭄ᬢᬶᬲᬓᬾᬂᬲᬸᬪᬓ᭄ᬢᬶ᭞ᬲᬳᬗᭂᬮᬸᬗᬗ᭄ᬕ᭞ᬦᬸᬦᬲ᭄ᬮᬸᬕ᭄ᬭᬭᬶᬂᬲᬂᬭᬯᬸᬄ᭞ᬭᬾᬄᬓᬤᬶᬧ᭄ᬭᬲᬗ᭄ᬕ᭞ᬫᬚᬸᬚᬸᬓ᭄ᬳᬶᬧᬸᬦ᭄ᬓᬵᬭᬶ᭞ᬲᬸᬫᬶᬬᭀᬓ᭄ᬲᬯᬂᬜᬶᬳ᭄ᬦᬬᬂ᭞ᬫᬦᬳᬶᬧᬸᬦ᭄ᬓᭂᬦ᭄ᬤᭂ᭠
ᬮ᭄ᬫᬫᬗ᭄ᬕᬸᬄ᭟ᬳᬶᬤᬲᬂᬫᬡᬶᬓᬶᬂᬧᬸᬭᬶ᭞ᬫᬮᬜ᭄ᬘᬭᬦ᭄᭞ᬓᬳᬶᬭᬶᬂᬲᬗᬩᬕᬸᬲ᭄᭞ᬗᬓ᭄ᬱᬶᬲᬃᬯ᭄ᬯᬲᬦ᭄ᬢᬸᬦ᭄᭞ᬭᬶᬂᬯᬦᬵᬰ᭄ᬭᬫᬗᬾᬤᬦᬶᬦ᭄᭞ᬦᭂᬫᭀᬦᬶᬦ᭄ᬓᬃᬝᬶᬓ᭞ᬦᭂᬥᭂᬂᬫᭂᬓᬃᬗᬮᬸᬧᬮᬸᬧ᭄᭞ᬳᬶᬓᬸᬫ᭄ᬩᬂᬫᬗᬸᬫ᭄ᬩᬂ᭞ᬫᬕᬭᬂᬗᬶᬲᭂᬧ᭄ᬲᬵᬭᬶ᭞ᬚᬦ᭄ᬢᭀᬲᬶᬧᬸᬦ᭄ᬓᬯᬋᬕᬦ᭄᭞
[᭑᭗᭖ 176A]
᭑᭗᭖
ᬜᬢᬸᬍᬕᬜᬶᬘᬶᬧᬶᬦ᭄ᬫᬥᬹ᭟ᬧᬗᬺᬂᬋᬂᬳᬶᬧᬸᬦ᭄ᬗᬋᬗᬶᬄ᭞ᬬᬦ᭄ᬲᬯᬗᬂ᭞ᬲ᭄ᬯᬭᬦ᭄ᬖᬡ᭄ᬝᬫᬩᬭᬸᬂ᭞ᬭᬶᬓᬵᬮᬲᬂᬯᬶᬓᬹ᭞ᬗᬸᬜ᭄ᬘᬭᬂᬯᬾᬤ᭄ᬥᬗᬲ᭄ᬢᬸᬢᬶ᭞ᬳ᭄ᬬᬂᬧ᭄ᬭᬫᬯᬶᬰᬾᬱ᭞ᬫᭂᬭᬶᬳᬂᬚᬕᬢ᭄ᬭᬳᬬᬸ᭞ᬫᬤᬓ᭄ᬤᬶᬃᬖ᭄ᬕᬬᬸᬱ᭞ᬲᬯᬢᭂᬓ᭄ᬲᬃᬯ᭄ᬯᬧ᭄ᬭᬡᬶ᭞ᬮᬸᬓᬢ᭄ᬲᬫᬮᬧᬢᬓ᭞ᬤᬾ
ᬦᬶᬂᬧᬫᬸᬦᬄᬳᬲ᭄ᬢᬸᬧᬸᬗ᭄ᬓᬸ᭟ᬓᬸᬤᬂᬭᬳᬶᬦᬫᬫᬵᬃᬕ᭄ᬕᬶ᭞ᬫᬩᬬᬗᬦ᭄᭞ᬫᬭᬶᬂᬳᬮᬲᬾᬜᬸᬲᬸᬧ᭄᭞ᬲᬂᬓᬵᬮᬶᬄᬮᬸᬫᬓᬸ᭞᭠ᬓᬵᬫᬚᬬᬭᬵᬚᬧᬸᬢ᭄ᬭᬶ᭞ᬲᬄᬲᬓᬾᬂᬢᬶᬬᬜᬃ᭞ᬫᬗᬸᬗ᭄ᬲᬶᬓᬕᬸᬦᬸᬂᬳᬕᬸᬂ᭞ᬫᬥ᭄ᬬᬦᬶᬂᬧᬃᬯ᭄ᬯᬢ᭞ᬲᬕᬾᬢ᭄ᬭᬯᬸᬄᬦᬾᬫᬗ᭄ᬓᬶᬦ᭄᭞ᬫᬭᬶᬂᬤᬾᬰᬯ
ᬯᬶᬤᬗᬦ᭄᭞ᬩᭂᬲᬓᬶᬄᬫᬸᬦ᭄ᬤᬸᬓ᭄ᬓᭂᬮᭀᬤ᭄ᬓᬯᬸᬄ᭟ᬇᬭᬶᬓᬵᬓᭀᬘᬧ᭄ᬦᬾᬫᬗ᭄ᬓᬶᬦ᭄᭞ᬫᬘᬦᭂᬕᬦ᭄᭞ᬳᬗᭀᬩ᭄ᬲᬂᬓᬮᬶᬄᬫᬗ᭄ᬕᬸᬄ᭞ᬢᬸᬮ᭄ᬬᬫᬳᬵᬫᬾᬭᬸ᭞ᬧᬃᬳ᭄ᬬᬗᬦ᭄ᬪᬝᬵᬭᬲᬫᬶ᭞ᬓᬝᬄᬧᬸᬭᬧᬸᬭ᭞ᬯᬯᬗᬸᬦᬦ᭄ᬫᬾᬭᬸᬫᬾᬭᬸ᭞ᬧᬜᬸᬗ᭄ᬲᬸᬗᬦ᭄ᬚᬕᬢ᭄᭞ᬦᬸᬮᬶ᭠
ᬭᬭᬶᬲ᭄ᬫᬪᬓ᭄ᬢᬶ᭞ᬭᬵᬚᬧᬸᬢ᭄ᬭᬶᬓᬵᬫᬚᬬ᭞ᬫᬜᬓᬸᬧᬂᬢᬗᬦ᭄ᬧᬶᬂᬢᭂᬮᬸ᭟ᬲᬯᬸᬲᬦ᭄ᬋᬓᬾᬫᬪᬓ᭄ᬢᬶ᭞ᬢᬦ᭄ᬧᬢᬶᬃᬢ᭄ᬣ᭞ᬲᬂᬓᬵᬮᬶᬄᬭᬭᬶᬲ᭄ᬩᬗᬸᬦ᭄᭞ᬇᬥᭂᬧᬾᬭᬳᬬᬸ᭞ᬦᬶᬃᬫᬵᬮᬓᬢᭂᬓᬾᬗ᭄ᬳᬢᬶ᭞ᬓᬬᬸᬦᬾᬫᬮᬶᬮᬂ᭞ᬢᬦ᭄ᬫᬮᬶᬄᬫᬭᬱᬕᭂᬧᬸ᭞ᬯᬯᬸᬫᬓᬶᬍᬲᬦ᭄᭞ᬲᭂ᭠
