[᭑᭔᭘ 148B]
᭑᭔᭘
ᬗᭂᬢᬕᬶᬦ᭄ᬤᬯᬸᬄᬩᭂᬤᬗᬶᬦ᭄᭞ᬲ᭄ᬯᬭᬦ᭄ᬧᭂᬘᬸᬢᬾᬢᬦ᭄ᬧᭂᬕᬢ᭄᭟ᬭᬵᬚᬧᬸᬢ᭄ᬭᬶᬲᬳᬗᭂᬫ᭄ᬩᭂᬂᬯᬲ᭄ᬧ᭞ᬫᬯᬘᬦ᭞ᬳᬤᬸᬄᬓᬵᬫᬚᬬ᭞ᬓᬶᬚᬚᬦᬶᬧᬕᭂᬤᬶᬦᬾ᭞ᬗᬸᬤᬤᬶᬦᬶᬗᬭᬸᬓ᭄ᬭᬸᬓ᭄᭞ᬲᬯᬶᬭᬾᬄᬲᬸᬩᬢᭂᬗᬳᬶ᭞ᬩᬬᬮᬓᬃᬓᬢᬭ᭞ᬓᬵᬫᬚᬬᬫᬵᬢᬹᬃ᭞ᬫᭂᬦᭂᬂᬓᬾᬭᬢᬸᬳᬚ᭠
ᬳᬦ᭄᭞ᬚᬦ᭄ᬢᭀᬲ᭄ᬩᬸᬤᬮ᭄᭞ᬚᬤ᭄ᬫᬦᬾᬗᬸᬮᬳᬂᬧᬓ᭄ᬱᬶ᭞ᬕᬸᬫᭂᬦ᭄ᬢᭀᬲ᭄ᬲᬸᬯᬸᬂᬭᬶᬂᬲᬯᬄ᭟ᬓᬵᬮᬇᬭᬶᬓᬵᬗᬶᬭᬶᬂᬫᬫᬵᬃᬕ᭄ᬕᬶ᭞ᬫᬗᬮᬾᬭᬂ᭞ᬓᬤᬶᬳᬢᬹᬃᬢᬶᬢ᭄ᬬᬂ᭞ᬧᭂᬘᬓ᭄ᬫᬸᬗ᭄ᬕᬄᬭᬶᬂᬲᬸᬭᬵᬢᬾ᭞ᬦᬾᬓᬵᬢᬹᬃᬭᬶᬂᬳᬶᬭᬢᬸ᭞ᬧ᭄ᬭᬬᬮᬸᬗ᭄ᬳᬓᬩᭂᬲᬓᬶᬄ᭞ᬕᭂᬦᬄᬭᬭᬫᬦ᭄ᬢᬶᬢ᭄ᬬᬂ᭞ᬫ
ᬢᬧᬭᬶᬂᬕᬸᬦᬸᬂ᭞ᬭᬵᬚᬧᬸᬢ᭄ᬭᬶᬦᬸᬮᬶᬦᬶᬫ᭄ᬩᬮ᭄᭞ᬫᬗᬦ᭄ᬤᬶᬓ᭞ᬓᬵᬫᬚᬬᬤᭀᬂᬧᬶᬦᭂᬳᬶᬦ᭄᭞ᬳᬧᬂᬤᬕᬗ᭄ᬲᬭᬦ᭄ᬢᬶᬦ᭄ᬤᬓ᭄᭟ᬬᬾᬦ᭄ᬮᬚᬸᬧᬾᬢ᭄ᬚᬦᬶᬓᬩᭂᬲᬓᬶᬄ᭞ᬗᬮᬶᬄᬳᬶᬯ᭞ᬢᬦ᭄ᬯᬗ᭄ᬤᬾᬲᭂᬗ᭄ᬓᬮ᭞ᬤᭀᬂᬢᬗᬭᬶᬦ᭄ᬧᬗᭂᬢᬹᬢᬾ᭞ᬲᬶᬂᬜᬮᬓᬃᬓᬘᬸᬦ᭄ᬤᬸᬓ᭄᭞ᬲᬶᬦᬄ
ᬳᬤᬓᬩᭂᬲᬓᬶᬄ᭞ᬦᬾᬫᬚᬮᬦ᭄ᬜᭂᬋᬧᬂ᭞ᬢᬸᬮ᭄ᬬᬓᭂᬦᬢᬫ᭄ᬧᬸᬲ᭄᭞ᬳᬫ᭄ᬧᬳᬾᬫᬧ᭄ᬯᬭᬚᭂᬗᬄ᭞ᬮᬓᬃᬓᬸᬤ᭄ᬬᬂ᭞ᬫᭂᬮᬄᬳᬤᬾᬗᬂᬳᬩᭂᬤᬶᬓ᭄᭞ᬮᬲ᭄ᬬᬦᬾᬫᬮᬸᬘᬕᭂᬭᬂ᭟ᬢᭀᬂᬜᬦ᭄ᬤᬂᬗᭀᬚᭀᬕ᭄ᬓᭂᬫᭀᬦᬾᬚᬦᬶ᭞ᬳᬾᬗ᭄ᬕᬮᬾᬗ᭄ᬕᬮ᭄᭞ᬳᬶᬮᬳᬶᬮᬤ
[᭑᭔᭙ 149A]
᭑᭔᭙
ᬳᬢ᭄᭞ᬲᬢ᭄ᬫᬘᭂᬩᬸᬃᬤᬶᬓᬯᬳᬾ᭞ᬓᬵᬫᬚᬬᬢᭂᬮᬗ᭄ᬓᬸᬧ᭄᭞ᬫᬢᬗᬦᬦ᭄ᬫᬵᬢᬹᬃᬲᬶᬲᬶᬧ᭄᭞ᬯ᭄ᬬᬓ᭄ᬢᬶᬓᬤᬶᬯᬘᬦ᭞ᬗᬶᬭᬶᬂᬫᭂᬗ᭄ᬓᭂᬩ᭄ᬤᬸᬫᬸᬦ᭄᭞ᬕᬸᬫᭂᬦ᭄ᬢᭀᬲᬶᬧᬸᬦ᭄ᬓᬗ᭄ᬳᬾᬮᬦ᭄᭞ᬲᬂᬜᭂᬋᬧᬂ᭞ᬓᬾᬗᬶᬦ᭄ᬤᬗᬦᬦ᭄ᬫᬫᬵᬃᬕ᭄ᬕᬶ᭞ᬢᬦ᭄ᬓᬘᬦ᭄ᬤᬓ᭄ᬲᬶᬂᬲᬶᬂᬚᬮᬦ᭄᭟ᬩᬶᬮᬶᬄᬓᬢᬄᬲᬵᬫ᭄ᬧᬸ
ᬦ᭄ᬗᭂᬢᬹᬢ᭄ᬩᬸᬭᬶ᭞ᬩᬶᬮᬂᬤᬗ᭄ᬓ᭞ᬭᬵᬚᬧᬸᬢ᭄ᬭᬶᬦᬶᬫ᭄ᬩᬮ᭄᭞ᬗᬮᬧ᭄ᬓᬲᭀᬃᬯᬘᬦᬦᬾ᭞ᬓᬵᬫᬚᬬᬬᬂᬢᬓᬸᬢ᭄᭞ᬬᬦᬶᬂᬳᬯᬓᬾᬦᬸ᭠ᬪᬓ᭄ᬢᬶ᭞ᬫᬵᬢᬹᬃᬦᬸᬗᭂᬲᭀᬃᬪᬵᬱ᭞ᬫᬘᭀᬓᭀᬭᬶᬭᬢᬸ᭞ᬲᬶᬦᬄᬮᬓᬃᬓᬘᬶᬭᬾᬦᬦ᭄᭞ᬪᬶᬦᬯᬗ᭄ᬰ᭞ᬧᬗᬸᬘᬧᬾᬫᭂᬲᭀᬃᬲᬶᬗ᭄ᬕᬶᬄ᭞ᬢ᭄ᬯᬭᬲᭀ
ᬢᬦᬶᬂᬫᬜᬫ᭟ᬫᭂᬮᬄᬕᭂᬦ᭄ᬢᭀᬲᬶᬦ᭄ᬫᬸᬜᬶᬦᬾᬚᬦᬶ᭞ᬫᬭᬭᬲᬦ᭄᭞ᬗᬸᬤᬫᬲᬺᬓᬾᬦᬦ᭄᭞ᬢ᭄ᬯᬭᬜᬾᬗᭂᬳᬂᬳᬸᬦ᭄ᬤᬸᬓᬾ᭞᭠ᬦᬫ᭄ᬧᭂᬤᬂᬳᬕᭂᬢ᭄ᬮᬘᬸᬭ᭄᭞ᬳᬚᬓ᭄ᬤᬤ᭄ᬯᬩᬸᬓᬚᬦᬶ᭞ᬫᬕᭂᬳᬂᬧᬲᭀᬪᬵᬬ᭞ᬫᬕᭂᬢᬶᬄᬳᬩᬸᬂᬩᬸᬂ᭞ᬗᬮᬶᬄᬍᬕᬤᬶᬲᬓᬵᬮ᭞ᬓᬵᬫᬚᬬ᭞ᬫᭂᬮ
ᬳᬦ᭄ᬫᬩᭂᬮᬶᬳᬤᬶ᭞ᬗᬲᬄᬪᬵᬱᬫᬲᭀᬘᬧᬦ᭄᭟ᬳᬧᬂᬢ᭄ᬯᬭᬓᬧᬧᬕ᭄ᬓᬧᬗ᭄ᬕᬶᬄ᭞ᬓᬢᭂᬗᭂᬭᬦ᭄᭞ᬬᬂᬫᬤᬾᬯᬾᬓ᭄ᬫᬾᬦᬓ᭄᭞ᬢᬦᬶᬳᬲᬶᬦ᭄ᬧᬚᬮᬦᬾ᭞ᬲᬮᬫ᭄ᬧᬄᬩᬋᬂᬦᬸᬢᬸᬕ᭄᭞ᬓᬵᬫᬚᬬᬗᭂᬧᭂᬲ᭄ᬗᭂᬮᬶᬂ᭞ᬲᬶᬕ᭄ᬲᬶᬕᬦ᭄ᬫᬵᬢᬹᬃᬦᬶᬫ᭄ᬩᬮ᭄᭞ᬓᬗᭂᬦ᭄ᬢᬶᬢ᭄ᬬᬂᬭᬢᬸ᭞ᬫᬶᬭ᭠
