[᭕᭙ 59B]
᭕᭙
ᬳᬶᬤᬵᬮᬶᬦ᭄ᬢᬂᬫᭀᬩᭀᬢᬂ᭞ᬮᬶᬗ᭄ᬕᬶᬄᬳᬶᬤᬵᬲᬫᬶᬗᬃᬤ᭄ᬥᬶ᭟ᬧᬦ᭄ᬳᬶᬤᬓᬮᬶᬦ᭄ᬢᬂᬤᬃᬫ᭄ᬫᬵ᭞ᬤ᭄ᬭᬡᬮᭀᬮ᭄ᬬᬭᬶᬂᬮᬭᬦ᭄ᬳᬶᬤᬵᬗᬸᬦᬶ᭞ᬳᬯᬦᬦ᭄ᬳᬶᬤᬵᬳᬶᬤ᭄ᬯᬕᬸᬂ᭞ᬲᬸᬰ᭄ᬭᬸᬱᬩᬓ᭄ᬢᬶᬓᬮᬶᬦ᭄ᬢᬂ᭞ᬭᬶᬂᬦᬾᬗᬃᬤ᭄ᬥᬶᬭᬶᬂᬓᬳᬢ᭄ᬯᬂᬓᬮᬗ᭄ᬓᬸᬂ᭞ᬓᬮᬶᬄᬳᬶᬤᬵᬮᬮᬶᬧᬶᬲᬦ᭄᭞ᬭᬶᬂᬭᬶᬲ᭄ᬬᬦ᭄ᬭᬓᬦ᭄ᬤᬗᬸᬦᬶ
ᬓᬮᬶᬄᬳᬶᬤᬵᬕᬸᬦᬂᬧᬶᬲᬦ᭄᭞ᬭᬶᬂᬲᬫ᭄ᬬᬦ᭄ᬧᬶᬥᭂᬡ᭄ᬥᬦ᭄ᬲᬗ᭄ᬳ᭄ᬬᬂᬯᬶᬥᬶ᭞ᬓ᭄ᬭᬡᬚᬓ᭄ᬫᬓ᭄ᬚᬂᬩᬸᬤᬸᬄ᭞ᬫᭂᬗ᭄ᬕᬄᬳ᭄ᬮᬲ᭄ᬓᬾᬦ᭄ᬳᬶᬤᬵ᭞ᬲᬧᬸᬦᬶᬓᬧᬧᬶᬦᭂᬄᬳᬶᬤᬤᬶᬓᬬᬸᬦ᭄᭞ᬳᬯᬦᬳᬶᬤᬗᬫᬸᬭᬵ᭞ᬫᭂᬗ᭄ᬕᬄᬢᬦ᭄ᬧᬫ᭄ᬗᬦ᭄ᬯ᭄ᬬᬓ᭄ᬢᬶ᭟ᬯᬸᬲ᭄ᬧᬸᬧᬸᬢ᭄ᬫᬓᬦ᭄ᬤᬲᬫ᭄ᬬᬦ᭄᭞ᬓᬬᬂᬳᬸᬫᬄᬧᬋᬓ
ᬦ᭄ᬫᬸᬦ᭄ᬤᬸᬓ᭄ᬱᬫᬶ᭞ᬮᬦᬂᬳᬶᬲ᭄ᬢ᭄ᬭᬶᬮᬶᬦ᭄ᬢᬂᬳᬦᬸᬢ᭄᭞ᬫᬶᬦᬓᬤᬶᬧᬺᬧᬸᬢᬺ᭞ᬳᬶᬤᬾᬯᬕᬸᬂᬓᭀᬤᬮ᭄ᬩᬩᬜ᭄ᬘᬶᬗᬄᬳᬕᬸᬂ᭞ᬭᬾᬄᬳᬶᬤᬵᬧᬘᬂᬦᬯᬸᬳᬂ᭞ᬓ᭄ᬦᬶᬫᬤᬩ᭄ᬤᬩᬦ᭄ᬫᬮᬶᬄ᭟ᬧᬺᬧᬸᬢ᭄ᬭᬵᬫᬗᬶᬭᬶᬂᬲᬫ᭄ᬬᬦ᭄᭞ᬲᬵᬫ᭄ᬧᬸᬦ᭄ᬳᬶᬤᬵᬤᬶᬩᬜ᭄ᬘᬶᬗᬄᬦᬾᬫᬗ᭄ᬓᬶᬦ᭄᭞ᬭᬤᬾᬦ᭄ᬳᬃᬬ᭄ᬬᬤ᭄ᬫᬂᬤ᭄ᬫᬸᬂ᭞ᬯᬸᬲ᭄ᬳᬶᬤᬵᬤᬶᬩᬜ᭄ᬘᬶ
ᬗᬄ᭞ᬮᬾᬦ᭄ᬧ᭄ᬭᬭᬵᬢᬸᬓᬼᬢ᭄ᬯᬭᬵᬩᬓᬢ᭄ᬳᬶᬢᬸᬂ᭞ᬳᬶᬤᬾᬯᬕᬸᬂᬫᬗᬦ᭄ᬤᬶᬓᬵ᭞ᬭᬶᬂᬳᬶᬤᬵᬦᬾᬦᬗ᭄ᬓᬶᬮ᭄ᬲᬫᬶ᭟ᬳᬸᬧᬘᬭᬩ᭄ᬯᬶᬦ᭄ᬧᭂᬲᬸᬯᬂ᭞ᬚᬸᬮᬶᬓᬺᬩᬸᬂᬩ᭄ᬯᬶᬦ᭄ᬳᬩᬳᬩᬳᬶᬦ᭄᭞ᬫᬫᬲ᭄ᬩ᭄ᬤᬶᬮ᭄ᬧᬥᬳᬶᬢᬸᬂ᭞ᬳᬸᬦ᭄ᬤᬸᬓᬂᬦᬾᬓᬃᬗᬩ᭞ᬧᬺᬭᬵᬢᬸᬦᬾᬫᭂᬧᭂᬲ᭄ᬜᭂᬫ᭄ᬩᬄᬫᬩ᭄ᬭᬶᬬᬸᬓ᭄᭞ᬫᬮᬶᬄᬳᬶᬤᬵᬫᬦ
[᭖᭐ 60A]
ᬯᬸᬳᬂ᭞ᬧᬘᬂᬓᬫᬜ᭄ᬘ᭄ᬬᬸᬫᬮᬶᬄ᭟ᬯᬢᭂᬓ᭄ᬕᭀᬂᬧᬤᬢᬸᬳᬸᬦᬂ᭞ᬤᬶᬫᬃᬕᬦᬾᬧᬂᬗᬧᬶᬢ᭄ᬫᬃᬕ᭄ᬕᬳᬰ᭄ᬭᬶ᭞ᬳᬳᭀᬯᬂᬢ᭄ᬓᭂᬤ᭄ᬓᬫᬜ᭄ᬘ᭄ᬬᬸ᭞ᬲᬸᬭᬤᬤᬸᬢᬸᬳᬸᬦᬂ᭞ᬳᬸᬮᬶᬓᬧᬮ᭄ᬳᬧᬂᬫᬩᬭᬶᬲᬦ᭄ᬮᬯᬸᬢ᭄᭞ᬫᬮᬶᬄᬳᬶᬤᬵᬫᬦᬯᬸᬳᬂ᭞ᬭᬶᬂᬳᬶᬤᬵᬳᬶᬕᬸᬲ᭄ᬢᬶᬧᬢᬶᬄ᭟ᬓ᭄ᬦᬶᬫᬗ᭄ᬯᬶᬮᬗᬶᬦ᭄ᬲᬸᬦ᭄ᬬ᭞ᬳᬧᬂ
ᬫᬸᬦ᭄ᬤᬸᬓ᭄ᬩ᭄ᬭᬶᬬᬸᬓ᭄ᬜᭂᬫ᭄ᬩᬄᬲᬳᬶᬭᬶᬂ᭞ᬲᬳᬸᬧᬓᬭᬯᬸᬲ᭄ᬧᬸᬧᬸᬢ᭄᭞ᬲ᭄ᬧᭂᬂᬳᬶᬤᬵᬦᬯᬸᬳᬂ᭞ᬲᬕᬾᬢ᭄ᬓ᭄ᬓᬢᬸᬃᬧᬗ᭄ᬯᬾᬤᬗᬦ᭄ᬳᬰ᭄ᬭᬷᬮᬗᬸ᭞ᬢᬦ᭄ᬓᭀᬘᬧᬲᬵᬫ᭄ᬧᬸᬦ᭄ᬳᬸᬲᬦ᭄᭞ᬳᬶᬤᬾᬯᬕᬸᬂᬯᬸᬲ᭄ᬓᬧᬸᬭᬶ᭟ᬗ᭄ᬳᬶᬂᬭᬶᬂᬳᬃᬤ᭄ᬥᬵᬫᬡᬶᬓ᭄ᬳᬾᬶᬤᬵ᭞ᬭᬾᬄᬳᬭᬶᬦ᭄ᬤᬵᬳᬶᬤᬳᬶᬤ᭄ᬯᬕᬸᬂᬳᬶᬲ᭄ᬢ᭄ᬭᬶ᭞ᬦᬓᬕᬸᬂᬳᬶᬲ᭄ᬢ᭄ᬭᬶ
ᬢᬦ᭄ᬓᬦ᭄ᬢᬸᬦ᭄᭞ᬫᬗ᭄ᬕᭂᬄᬭᬶᬂᬫᬜ᭄ᬘ᭄ᬬᬸᬭᬚᬵ᭞ᬳᬦᬓᬕᬸᬂᬩ᭄ᬬᬂᬓᬳᬢᬸᬭᬦ᭄ᬲᬫ᭄ᬧᬸᬦ᭄᭞ᬫᬤᬾᬯᬶᬳᬲ᭄ᬢ᭄ᬭᬫᬸᬱ᭄ᬝᬧᬵ᭞ᬗ᭄ᬯᬶᬮᬗᬶᬦ᭄ᬲᬦᬾᬳᬶᬭᬶᬓᬶ᭟ᬲᬰᬸᬧᬓᬭᬦᬾᬲᬫ᭄ᬬᬦ᭄᭞ᬗᬫ᭄ᬩᬶᬮ᭄ᬗᬦ᭄ᬢᬾᬦ᭄ᬬᬦ᭄ᬲᬵᬫ᭄ᬧᬸᬦ᭄ᬭᬯᬸᬄᬯ᭄ᬬᬓ᭄ᬢᬶ᭞ᬧᬫᭂᬦ᭄ᬤᬓ᭄ᬦᬶᬫᬘᬸᬦ᭄ᬤᬸᬓ᭄᭞ᬫᬤᬾᬯᬶᬦᬾᬦ᭄ᬢᭂᬦ᭄ᬧᬶᬯᬮ᭄
᭞ᬫᬮᬶᬄᬳᬶᬤᬳᬶᬤᬾᬯᬕᬸᬂᬗᬦ᭄ᬤᬶᬓᬵᬳᬮᬸᬲ᭄᭞ᬭᬶᬂᬧᬋᬓᬦ᭄ᬳᬶᬲ᭄ᬢ᭄ᬭᬶᬲᬫ᭄ᬬᬦ᭄᭞ᬭᬶᬂᬤᬕᬶᬂᬓ᭄ᬦᬶᬫᬗᭂᬫ᭄ᬧᭀᬦᬶᬦ᭄᭟ᬳᬸᬧᬘᬭᬦᬶᬂᬧᬫᬺᬫᬦ᭄᭞ᬧᬗᬸᬜ᭄ᬘᬶᬗᬦ᭄ᬲᬫᬗ᭄ᬤᬾᬫᬸᬦ᭄ᬤᬸᬓ᭄ᬳᬰ᭄ᬭᬶ᭞ᬓᬶᬘᬾᬦ᭄ᬫᬶᬜᬓ᭄ᬧᬾᬦ᭄ᬤᬾᬃᬲᬵᬫ᭄ᬧᬸᬦ᭄᭞ᬧᬘᬂᬦᬶᬲ᭄ᬢᬶᬲ᭄ᬧᬫᬺᬫᬦ᭄᭞ᬯᬢᭂᬓ᭄ᬫᬶᬜᬓ᭄ᬧᬤᬦᬾ
Kaca:Bali-lontar-gaguritan-cokoratu-01-250ppi.pdf/60
Kaca puniki sampun kauji-wacén
