[᭑᭑ 11B]
᭑᭑
ᬓᬢᬭᬦ᭄ᬬᬰᬵᬫᬤᬸᬮᬸᬃ᭞ᬫᬶᬯᬄᬧᬸᬦ᭄ᬬᬵ᭞ᬓᬢᬹᬃᬲᬫᬵᬢᬺᬳᭂᬭᬶᬂᬳᬶᬤᬵ᭚ᬫᬗ᭄ᬮᬦ᭄ᬢᬸᬃᬭᬭᬶᬲ᭄ᬗᬃᬬ᭄ᬬᬦᬶᬦ᭄᭞ᬲ᭄ᬓᬃᬘᬢᬹᬭᬾᬤᬩ᭄ᬤᬩᬂ᭞ᬗᬦ᭄ᬢᬶᬤᬶᬯᬱᬵᬦᬾᬳᬬᬸ᭞ᬭᬶᬂᬭᬳᬶᬦᬦᬾᬗᬯᬶᬢᬂ᭞ᬗᬃᬬ᭄ᬬᬦᬶᬦ᭄ᬲᭂ
ᬓᬭᬶᬂᬲᬚᬷ᭞ᬭᬶᬓᬮᬵᬤᬦᬵᬭᬳᬬᬸ᭞ᬫᬗᬯᬶᬢ᭞ᬗᬃᬬ᭄ᬬᬦᬶᬜ᭄ᬘᬢᬹᬃᬧᬸᬦᬶᬓᬵ᭚ᬢᬶᬕᬂᬧᭀᬭᭀᬦ᭄ᬓᬓᬃᬬ᭄ᬬᬦᬶᬦ᭄᭞ᬲᬚᬶᬘᬢᬹᬭᬾᬧᬶᬂᬢᬶᬕᬵ᭞ᬓᬳᬢᬹᬭᬶᬂᬲᬗ᭄ᬕᬃᬳᬕᬸᬂ᭞ᬫᬮᬶᬗ᭄ᬕᬵᬭᬶᬂᬲᬗ᭄ᬕᬃᬢᬯ᭄ᬯᬂ᭞ᬧᬶᬂᬢᬶ
ᬕᬵᬗᬢᬹᬭᬂᬲᬚᬶ᭞ᬲᬸᬘᬶᬘᬢᬹᬭᬾᬓᬳᬢᬹᬃ᭞ᬲᬦᬾᬫᬸᬗ᭄ᬕᬄ᭞ᬧᬶᬂᬢᬶᬕᬵᬭᬶᬂᬲᬗ᭄ᬕᬃᬢᬯ᭄ᬯᬂ᭚ᬲᬗ᭄ᬕᬃᬢᬯ᭄ᬯᬂᬘ᭄ᬭᬶᬢᬵᬫᬗ᭄ᬓᬶᬦ᭄᭞ᬫᬕᭂᬦᬄᬮᭀᬭᬶᬂᬧᬗ᭄ᬕᬸᬗᬦ᭄᭞ᬲᬸᬓᬢ᭄ᬜᬦᬾᬫᬗ᭄ᬓᬶᬦ᭄ᬳᬸᬗ᭄ᬕᬸᬄ᭞ᬧ᭄ᬢᬂᬤ᭄ᬧᬵᬫ᭄ᬯᬂᬳᬸᬭᬶᬧ᭄ᬜᬵ᭞ᬫ
ᬭᭀᬂᬢᬶᬕᬵᬫᬸᬮᬸᬓᬗᬶᬦ᭄᭞ᬳᬋᬧ᭄ᬲᬗ᭄ᬕᬃᬫ᭄ᬯᬄᬗᬯᬗᬸᬦ᭄᭞ᬲᬗ᭄ᬕᬃᬢᬸᬢ᭄ᬯᬦ᭄᭞ᬫᬳᬭᬦ᭄ᬲᬗ᭄ᬕᬅᬓᬱᬵ᭚ᬭᬶᬂᬳᬸᬦ᭄ᬤᬕ᭄ᬲᬗ᭄ᬕᬃᬤᬕᬶᬗᬶᬦ᭄᭞ᬫᬧᬧᬶᬦ᭄ᬤᬦ᭄ᬦᬵᬕᬓᬃᬯᬵ᭞ᬳᬶᬓᬸᬳᬾᬳᭂᬦ᭄ᬢᭂᬕ᭄ᬓᬮᬸᬯᬸᬃ᭞ᬲᭀᬧᬵᬘᬭᬵ
[᭑᭒ 12A]
ᬲᬫᬶᬧ᭄ᬢᬓ᭄᭞ᬧᬚᭂᬂᬢᬸᬗ᭄ᬕᬸᬮ᭄ᬲᬫᬶᬧᬸᬢᬶᬄ᭞ᬓᭀᬩᬾᬭᬾᬫᬲᬹᬭᬢ᭄ᬲᬫ᭄ᬧᬸᬦ᭄᭞ᬫᬧᬧᬶᬦ᭄ᬤᬦ᭄᭞ᬑᬗ᭄ᬓᬭᬵᬫᬹᬃᬢ᭄ᬢᬶᬫᬫᬶᬬᬦ᭄᭚ᬭᬶᬂᬳᬋᬧ᭄ᬲᬗ᭄ᬕᬭᬾᬫᬮᬶᬄ᭞ᬯᬯᬭᬸᬂᬩᬸᬦ᭄ᬤᭂᬃᬜᬍᬫ᭄ᬧᬂ᭞ᬓᬶᬓ᭄ᬭᬸᬕ᭄ᬲᬦᬾᬗ
ᬯᬗᬸᬦ᭄᭞ᬓᬶᬕᬵᬫ᭄ᬩᭀᬄᬤᬤᬶᬢᬸᬓᬂᬜ᭞ᬲᬧ᭄ᬮᭀᬓ᭄ᬕᭂᬦᬳᬶᬂᬲᬚᬷ᭞ᬲᬫᬬᬸᬢᬾᬲᬦᬾᬓᬢᬹᬃ᭞ᬫᬭᬶᬂᬲᬗ᭄ᬕᬃ᭞ᬧᬩᬗ᭄ᬓᬶᬢ᭄ᬕᬫᬜ᭄ᬘᬤᬾᬱᬵ᭚ᬲᬃᬯ᭄ᬯᬵᬫᭂᬦ᭄ᬢᬳᬾᬓᬧᬸᬚᬶ᭞ᬢᭂᬕ᭄ᬢᭂᬕ᭄ᬫᬶᬯᬄᬧᬸᬮᬵᬓᬺᬢ᭄ᬬᬵ᭞ᬧᬸ
ᬮᬵᬩᬕ᭄ᬬᬵᬦᬾᬓᬳᬢᬹᬭᬵ ᭚ᬧᬵᬳᬹᬮᬵᬓᬥᬢᭀᬦ᭄ᬢᬦ᭄ᬧᬲᬄ᭞ᬳᬶᬩᬸᬲᬸᬕᬶᬄᬫᬦ᭄ᬤᬸᬮᬸᬭᬶᬦ᭄᭞ᬧᬸᬮᬵᬕᬾᬫ᭄ᬩᬮ᭄ᬲᬫ᭄ᬧᬸᬦ᭄ᬓᬢᬹᬃ᭞ᬓᬧᬶᬂᬢᬶᬕᬵ᭞ᬓᬃᬬ᭄ᬬᬦᬾᬧᬥᬓᬢᬹᬭᬦ᭄᭚ᬓᬸᬮᭀᬦ᭄ᬧᬗ᭄ᬕᬃᬕ᭄ᬦᬄᬲᬚᬶ᭞ᬩ
ᬮᬾᬯᬶᬍᬢᬦ᭄ᬯᬗᬸᬦᬂ᭞ᬧᬜ᭄ᬘᬋᬱᬶᬩᬮᬾᬳᬶᬓᬸ᭞ᬢᬶᬕᬂᬩᬸᬗ᭄ᬓᬸᬮ᭄ᬓᬯᬗᬸᬦᬂ᭞ᬭᬶᬂᬳᬋᬧ᭄ᬧᬗ᭄ᬕᬸᬂᬫᬭᬶᬭᬶᬕ᭄᭞ᬚᬚᬃᬢᬶᬕᬵᬕ᭄ᬦᬄᬳᬶᬧᬸᬦ᭄᭞ᬧᬥᬫ᭄ᬬᬲ᭄ᬬᬲ᭄᭞ᬫᬤᬕᬶᬗᬶᬦ᭄ᬧᬧᬚᬗᬦ᭄᭚ᬲᬚᬶᬦᬾᬭᬶᬂᬩᬮᬾ
Kaca:Bali-lontar-gaguritan-bahligya-300ppi.pdf/12
Kaca puniki sampun kauji-wacén
