55
6. Lawan syapeki pwa ngaranmu ring rāt,
pilih mahākin nara dewa rāja,
sake halĕp tādhika dibyarūpa,
smarāmarānung pinakopamanta.
7. Bhaṭāra wiṣṇu pwa kunang -/- linganku,
/29.b./ kitenya mūrtti hyang-anangga duṣṭa,
prayojanāngadugĕng ing kaśaktin,
ulah pwa deādbhuta cakrapāṇi.
8. Tri wikramānung makapāngadantā,
tangañ catur mewwi wu sangkya ghora,
śirah susun sapta matumpa - tumpang,
haneka sewu lwir-ikang matākweh.
9. Īkā ta rūpanta lawan guṇanta,
tahānghulun sora tkapmu ring prang,
yadin kamu hyang suranātha mangko,
hilang tekang bajra wibajra dengku.
10. Nahan wuwus ning gajawaktra rodra,
narendra putrādbhuta sarjja tojar,
tatan surendrāku tan ari hyang,
mahājana kṣatriya bhāratangśa.
11. Nghulun suta śrī nṛpa hastinendra,
prakāṣa sajña sutasoma ring rāt,
mareng girīśṛngga sinadhya tan len,
girīndra rājeki ginĕngkwing-ambĕk.
