52
ptung - ptung i salwang-ing gĕgĕra wor i wuluh ika rumambaying parung,
guhāpbung-ike dalĕmnya pilih-unggwan i macan [28.a.] ike ghora gĕng / galak.
7. Kidulnya hana tirttha nirmmala sake ruhur-i pucak-ikang gunung magöng,
tḍunya gumuruh tkeng jurang-awarṇna grĕh i pasurak ning-ampuhan,
ī sornya dhngĕn ārjja sanggar awawar janur aking asamīpa kāhyangan,
pilih makapamūrṣitan tkapi sang kawi hana sĕsĕran tanah tikĕl.
8. Narendra suta yeka tandwa marahup sira wkas-an-asūryyasewana,
tlasta haliwat laris nira sakerika saha rĕṣi sangghya mangdulur,
jurang - jurang-arĕs haneki wiṭa wṛkṣa kĕpuh agĕng-arambuyan matĕb,
paranti: paran-ing mahākala duṣṭa mamati - mati satwa ring wana.
9. Rikā prawara keśawājar-i narendra suta ri hana ning mahāsura,
gajendramuka śūciloma suta tatwa nika pangawak-ing kalin tka,
awaknya kadi parwwatāgĕng-aluhur matan-ika rawi tulya ya paḍang,
galaknya kadi kalarudra mihat-ing bhuwana ri sḍĕng-ing prakāmpita.
