260
len tang rotānggalah trus jaja nika sinuduk pinrih sinurupan,
dukduk cakrākabĕt nghing gaḍa paraśu tuhuk kris kadga mangne.
3. Prodbhūtang daitya yakṣādhipa parĕng-umasö lwir hombak-angalun,
grit - grit - grit ghūrṇnitang pārthiwa ratha lumurug lwir guntur rangalih,
hetunyan prang bangun nyūhang-acala gumtĕr tekang kṣititala,
de ning sarwwāstra dibyāstra kahawa ya rubuh tekang gunung-anak.
4. Lāwan sakweh watĕk kṣatriya suta tumitih munggwing gaja kula,
sök tang bāṇāngrujak rākṣasa makasulayah malwang sangang-iwu,
ngkā krodhang dūmawadwāpanah-amanahakĕn bhūtar - sura masö,
bālā mweng bajra sangke tutuk-ika kumutug [130.a.] lwir dhūma mangasut. /
5. Yokālah sang watĕk hastina bala malayū rūg tan patulungan,
kewran de ning warāstrānakiti ya tumibeng hanggopama hudan,
tĕkwan ginlie tinut de ning asura pinangan tĕṇḍasnya kinmah,
len tang rodranguyup rah ḍaḍa nika malĕbĕk muñcar kadi bañu.
