194
10. Paḍātyanteng wīrāmuk - inamuk-anglwāng-i manurung,
sudhīrāmrang - pinrang gulu nika tugĕl mūrddha masahut,
kawāṇḍakweh rotādbhutang-anuduk-ing śūla malungid,
umumbul rahnya lwir wulakan-umijil rodra kumucur,
11. Wawang krodhāngḍuk ring kṛtala muśalang rākṣasa bala,
dudūng krūrānambut gunung-anak-ikā mwang watu magöng,
alah mewwīiwwang singhalabala pjah kumyus-atakut,
larut kewran tandwanuyek-irika sangkeng-awang-awang.
12. Katuṇḍĕs nggwan sang baṇa sira ma -/- mutĕr 98.b. ḍaṇḍa tinahĕn,
pupuh sakweh ning rākṣasabala balāwahana guut,
muwah sakweh sang kṣatriya rari hajī prodbhuta masö,
makāsyāng salwā hrū niran-angibĕkī bhyoma lumĕpas.
13. Aneka lwang ning rākṣasa pjah-ikā de nṛpasuta,
waneh bhraṣṭa ring hawyat-asura tibākweh katlĕbuk,
sawang warṣādṛs tang kunapa matmah parwwata śawa,
humilyang rah lwir habdhi rudhira karang sarwwa niśita.
---oOo---
