170
sāmpun rakwa sireki munggah irikang ratha maṇimaya bhāswarāparimitā,
86.a. mangkat śighra tkeng balā -/- ngiringi huntat i harĕp ira sĕh ya tākrama halĕp,
mukyā śrī daśabāhu putra pakarākṣaka katiga tuduh narendra karaṇa.
2. Ramyākwah madědět tikang ratha matūt sisi hana gaja len turangga rumuhun,
mwang tekang maḍarat sĕsĕk pnuh ikang hawan awkasan amurang murang adoh,
māryyātūt tpi ning pasir sira tkeng hiring-iringi kalangwaning giri wana,
wanwālit ri lĕpitnya hana maṇḍala kuti-kuti dharmmaśāla katmu.
3. Deśagöng ri lĕbak-lebaknya walahar bañu nika gumrĕh bangun yyak-umuni,
katyāgan kidul-ing pkĕn parubunganya ri harĕp-ika śobhitarjja hinĕduk,
nyang grodhāmbulurang rĕboddhi maluhur tahĕn-ika ri samīpa ning kabuyutan,
sanggar mwang dngĕn-ing paḍū hana wawar janurasmu hañar kapūjan acaru.
4. Ndah sāmpun naliwat sirerika tgal-tĕgal-arat sayojanālwa katmu,
ngke keryyāna hanan dukut mrak-alalang sumarah irikā lawan kamurugan,
pintĕn ngganya huwus kagunturani ngūni kara-/- [86.b.] ṇa nika tanyāngṛsi suku,
wātwākweh sawaluh salumpang amijā hana sadurung awarṇna ghopura rubuh.
