155
Janggāngol nyū geḍing rūm niran-angamĕr-urojārjja sang śrī sudewi,
mojar pojar nira lwir grĕh-amisiki sinwam-nwaming nāgapuṣpa.
---000---
1. Dyah sanghyang-i rāga ning karaktan turida [78. b.] piturun-ing ka -/- rāsikan,
sang lwir sūkṣma sakeng śarīra matmah ratih-i sḍĕng-ing ngangĕgö smara,
pāwak ning kalanggĕn mamiṇḍa kari rūmta bsur i télénging pasir wukir,
sang sākṣat wangi ning skar nghulun-aminta wangin-ubhayanāngaras pipi.
2. Panghyang ningwang-i jöngta māsku mapa hetu ning-asmu wiwal pinangkwakĕn,
hyunkwānugraha sihta tan kakabĕteng siku gati ning-angolakén tngah,
mwang tan hewanānanggamĕl susu tasanmathan asunga spah sakeng waja,
byaktolih phala ning tapāku bibi yan hnĕng-akna sapolah-ing hulun.
3. Hah rakryan ring-apaku tan pjaha de ni panariking-ayunta dugsingi,
nghing pintangkwi tuhanku rakwa kita manghuwusakna gatingku kasihan,
caṇḍintakwi rarasta péṇḍĕmĕn-i rūmta tuduhakna margga ning rimang,
pūjan ring sari sah sakeng paṭah-ateki wisikana rĕngih ning-adyahi.
