150
āpan mahādibya jineśwarī kita,
wet ning mahārūpa wiśeṣa dewati,
norang wngī rājya tkapta bhāśwarā.
---oOo---
1. Kalingan-ika sameka sot ning strī jalu winuwus,
prabhawa niki sapolah tang rāt nduk wahun-umijil,
sahana hana nikang hyang bhaktyāngañjali ri kita,
surabhi kusuma lumrā sangkeng byoma kadi hudan,
2. Ndhya kari karaṇa ning tan tuhwānindita kesutén,
sing-ulah-ika ta himpér gĕṇḍis mwang madhu rinatus,
76.a. taha karika wuwus ning -/- moyut jatya marakakén,
suka pjaha kta ngwang mengke yan myga riyujar.
3. Nahan-ujar-ira mangde tuṣṭā śrī nṛpa duhita,
mahli guyu ri polah ning manggapuputapati,
lalu diwaśa surup ning candrekān sira maguling,
tayang-inipi nirānghing prāpteng kañcana bhawana.
4. Kṣaṇa rahina kamantyan sanghyang sūryya wahu mijil,
narapati sira sampun-ahyas mwang nṛpamahisi,
muwah-ika nṛpa putrī dewī tlas-asuji,
kaka -kaka nira sākṣat ṣtrīng kendrān sama mangiḍĕp.
---oOo---
1. Ndan sang śrī jinamūrtti rakwā ri huwus niran asuji manuṣṭanā hyang-ahalép,
mwang sang śālā sucitra dākṣa pakarowang-iran-amgil-ing taman sama marĕk,
