11
10. Yan kāngĕn rusiting giṇāmawa jagat tan wring dayāngenakā,
sök ring wiryya mahāprabhāwa sakalāwak hyang jagat kāraṇa,
rājānugraha wigraheki magawe bhaktyā nikang rāt kabeh,
strī rātnādhika bhoga bhojana pnuh yekāmangun pātaka.
11. Tĕkwan tan kawnang suminggahana sakweh ning mahādurjjana,
stryānak mwang kula waṇḍu yeka hamĕsĕn yāngkĕn kalĕngkeng jagat,
Yadyan rākṣasa detya bhūta muburang rāt dewa towyadbhuta,
manggĕh śatru tkap sang-ādiri lĕhĕng yan wīra śakting raṇa.
12. Yapwan sor sipi kāśmalanyan-inucap byāktā-nghĕting rorawa,
rūkṣakweh nikanang swarājya kahawang dharmmā pratiṣṭeng dangu,
śūrātyanta ri kāstawanyan atupis yan śatrun āśadbhuta,
himsa pāpa nikeka tan dwa rumawuh dūrā kayogīśwaran.
13. Sangksepanya wuwus patik haji ri sojar śrī narendrādhipa,
ndātan sĕnggahĕn-alpa dharmma kuṭilā -/- [7.a.] prang waktra niśśāsana,
